CM-in Tlabung RD block a puang Bial tinah chhungkaw 1500 tan SEDP Rs 50,000 - Zoramthanga

Mizoram sorkara Council of Ministers ṭhukhawmin Rural Development block thar siam a remtih tawh, Tlabung RD block puanna hun nimin khan Tlabunga Licheng Mualah hman a ni a; khuallian chief minister Zoramthanga chuan, kum 2022-23 financial year chhung ngeiin RD block office a taka kaltir an tum thu a sawi a; SEDP chu bial tinah chhungkaw 1500 aia tlem lo hnenah Rs 50,000 sem an tum thu a sawi.

CM Zoramthanga chuan, Tla­bungin RD block thar an nei chu a lawmpui thu sawiin, "Kum thar financial year chhung ngei hian office hi a taka kaltir kan tum a, RD block thar hmanga hmasawnna piang tur hi a hringtu dik takin a hrin zelna tura a nu dik tak nei thei turin ka chah che u a, department dang pawh a rawn awm belh zelna turin theihtawp kan chhuahho zel dawn nia," a ti.

Chief Minister hian sorkar laipui aṭanga puihna cheng nuai 200 a pe nghal a, state aṭanga special assistance atan cheng nuai 200 dang a pe nghal bawk. RD minister Lalruatkima pawhin thu a sawi.

RD block puan hma hian MNF party chuan mithar lawmluh inkhawm an buatsaih a, MNF President chuan, kum 2023-a MLA inthlanpui awm turah MNF party-in MLA seat 30 aia tlem lo an lâk ngei tur thu sawiin, "Congress party chu Delhi lamah nasa takin an tlahniam a, hmarchhakah an tlachhe ṭan mek. Mizoramah pawh Pu Lal Thanhawla'n a chawlhsan tawh a, ral lam an pan mek a ni," a ti.

Sorkar kum thar aṭangin Socio Economic Development Programme (SEDP) kalpui ṭan tum a nih thu sawiin Zoramthanga chuan, "MLA bial tinah chhungkaw 1,500 aia tlem lo tuam tumin Mizoram sorkarin ruahmanna a siam a, chhungkaw khat tan Rs 50,000 zel sem phawt tum a ni," a ti a; hmasawnna tur ruahmanna dang pawh a taka kalpui zel tum a nih thu a sawi.

Zoramthanga chuan, "Bial hmasawnna tura nau pâi mek hi ṭha taka piantir tur leh loh theih loha zai chhuaha piantir ngai lo turin bial mipuite'n ngaihtuahna thar séng turin ka ngen che u a ni," a ti a; MNF chhiatna ber bial ni ṭhin chu a ṭhatna ber bialah siamin, hmasawnna tura RD block hmanga bul ṭanna chu a aia tam leh ṭhahnem taka chhunzawm a nihna turin theihtawp chhuah turin mipui a chah.

MNF thuchhuah chuan, Zoram­thanga'n political party hrang hrang aṭangin MNF-ah mi 1,210 a lâwm lut niin a tarlang.