MST bus driver leh conductor zingah Covid-19 kai awm lo
Mizoram State Transport (MST) bus driver leh conductor mi 63-te chu June 14, 2020-ah an swab sample ZMC Laboratory-a endik a nih hnuah Covid-19 an kai lo vek tih June 18, Ningani khan hriat a ni a; hei vang hian khung hran an nihna hmun aṭangin an chhuak nghal.
Tarlan tawh angin, Mizoram páwn aṭanga Mizo rawn hawte Bairabi aṭanga an awmna district ṭheuha phurtu zingah MST bus driver leh conductor-te an tel a, conductor pakhatin Covid-19 a vei tih hmuh chhuah a nih hnuah, mi dang zawngte pawh swab sample endik tura ruahman a ni.
MST bus driver leh conductor zinga mi 63-te chu Mizoram UPC Assembly Centre, Zonuamah dah khawm an ni a, an swab sample pawh laka endik nghal a ni.
Transport director chuan zawhna chhangin, phai aṭanga lo hawte MST bus hmanga phurh an nihin driver leh conductor-te nen an inhnaih lo tih a sawi a, "Driver seat hnungah sarâng an zár a, fimkhur taka awm turin kan hrilh lâwk. Kan conductor positive kha a vanduai vang liau liau a ni," a ti.
A tìr lamah chuan driver leh conductor-te chu khung hran zel an nih thu sawiin Transport Director chuan, "Phai aṭanga lo hawte phurh zel a ngaih si avangin quarantine reng theih an ni lo a, fimkhur taka an chêt zui a ni. Hmai tuamna leh hand sanitizer pek vek an ni a, passenger-te kha khawngaih viau mah se, in khawih tur a ni lo," a ti a; tuna mi 63-te hma hian MST driver leh conductor mi 12 chu endiknaah hripui an kai lo tih hmuh a nih tawh thu a sawi bawk.
Hetih lai hian, Aizawl city bus driver leh conductor zinga Mizo tangkhang lo hawte phurtu mi 205-te pawh Covid-19 an kai leh kai loh RT-PCR hmanga enfiah turin June 17, 2020 khan R Dengṭhuama Hall-ah an swab sample lak a ni a; he thu ziah lai thleng hi chuan result hriat a la ni lo.