Chhawnzinga Lui Water Supply Scheme hawng ; Tuihna humhalh turin ṭanrual a ngai - Dy. CM

Atal Mission for Reju­ve­­nation and Urban Trans­formation (AMRUT) 2017-2019 kaltlanga Chanmari West-a 'Chhawnzinga Lui Water Supply Scheme' chu nimin khan deputy chief minister Tawnluia, PHE enkawltuin a hawng. Tawnluia chuan tuihna humhalh tura ṭanrual a ṭul thu a sawi.

Tawnluia chuan, tuihna humhalh a pawimawh thu sawiin, "Tuihna a tam theih nan humhalh turin mi tin kan ṭan rual a ngai a, Mizoram hmun hrang hranga lui tui kan tlante hnár humhalh a, tuihna tihpun hi mi zawng zawngin mawhphurhnaa kan lak a ngai," a ti.

Aizawl khawpui châwmtu GAWSS Phase-I leh Phase-II a awm tih sawiin Tawnluia chuan, "Kan kháwl neihte a upat tawh avangin pipeline thlengin thawm ṭhat a ngai a, sorkarin theihtawp chhuahin hma a la a, hei hian awmzia a nei ṭan. Tunah chuan ni tin tui litre maktaduai 28-30 kan pump thei tawh a, kan mamawh min la phuhru zo lo," a ti a; SIPMIU-in Tlawng lui tui lâkna tur kháwl an bun mek chu kum thar lamah zawh beisei a nih thu a sawi.

PHE Minister chuan, Aizawl chhim lam venga hmun hniam deuh châwm turin Ṭâwi tlang aṭangin lei hîpna (gravity) hmangin ni tin tui litre nuai 150 pe chhuak thei tur project thawh mek chu nakkumah zawh theih beisei a nih thu te, tui semna (distribution line) tihchangtlunna tur project sorkar laipuiah bawhzui mek a nih thu te, Jal Jeevan Mission hnuaiah kum 2023 ral hmain Mizoram thingtlang khaw tin tuam chhuah tum a nih thute a sawi bawk.

Chhawnzinga Lui Water Supply Scheme hi cheng nuai 230.73 sênga siam a ni a, Hunthar Veng, Edenthar Veng leh Chanmari West veng hmun ṭhenkhata cheng mi 4,200 vel châwm tura ruahman a ni a, tuihna pali lâk khawm hmanga tui lâk a ni.

UDPA department chu nodal agency niin, PHE department chu implementing agency a ni a, January 27, 2020 khan hna thawk ṭanin, March 30, 2020 khan thawh zawh a ni.