Dr Thangtea'n sorkar laipui hotute a dâwr

Minister Dr R Lal­thangliana chuan a department chan hnuaia hmachhawp leh hma­laknate a hlawhtlin theihna atan nimin khan New Delhi-ah sorkar laipui hotute a dâwr.

Health Minister hian Ayush leh Shipping & Waterways minister Sarbananda Sonowal chu a pisaah hmuin, tun hnaia Mizorama a lo kal a, Ayush Hospital leh thil dang dinna tur atana lungphùm a phúm chu tihlawhtling rang turin a ngen. Sonowal chuan, hun rei lo te chhunga chinfel thuai an inbeisei thu a lo hrilh.

Commerce & Industries changtu Dr R Lalthangliana hian Shipping & Waterways Minister hi Bangladesh nena insumdawn tawnna atan leh zin veivahna atana mipui náwlpuiin an hman ṭangkai theih­na tur Darzokai-Kawl­chaw (Chhimtuipui) leh Khawthlangtuipui, Bangladesh ramri depa awm chu mihring leh bungraw phurh theihna lawng chi khat - River Cruise Vessel project a siam turin a ngen a ni.

Higher & Technical Education (HTE) changtu R Lalthangliana chuan, Ministry of Education (Higher Education) secretary K Sanjay Murthy leh additional secretary Vineet Joshi te a kâwm a, Mizoram University Southern Campus chu a rang thei ang bera kalpui tura sawipuiin, "January 27, 2020-a phalna awm tawh si, beisei aiin a muang deuh a ni," a ti.

Ministry of Education hotute chuan, MZU-te nen ṭang tlanga hma an lak mek chu chak zawka an kalpui thu sawiin, theihtawp an chhuah zel tih an lo hrilh.

RUSA hnuaia assistant professor mi 70-te hlawh April 2021 aṭanga la sanction loh chu a ngaihmawh thu HTE Minister hian hian a thlen a; Ministry of Finance-in an tihfel ngaite an la tihfel loh avanga tlai a nih thu Ministry of Education Secretary chuan a sawi.

Health minister Dr R Lalthangliana hian nimin khan Health & Family Welfare Ministry pawh tlawhin, economic adviser (NHM) Indrani Kaushal leh official dangte a kâwm a; Mizoramin a mamawhna a san avangin NHM second instalment cheng vbc. 40 tal a rang thei ang bera pe tura a ngen bakah, PM-ABHIM account chu a rang thei ang bera pe chhuak turin a ngen.

Dr R Lalthangliana hian NITI Aayog adviser (NE) Dr Vindo K Paul pawh kâwmin, Civil Hospital, Aizawl tana Nephrology department dinna tur leh Civil Hospital tana theihtawp chhuaha ṭan a lâk tawhnaah lawmthu a hrilh. Dr Vinod K Paul chuan, Boeing India-in CSR fund kaltlanga MRI khawl cheng vbc. 6-7 inkar man an pek tur pawh ruahmanna peih ṭêp a nih thu chu a lo hrilh.

Meeting-a tel ve CSR Boeing director Praveena chuan, MRI khawl pek tura tihfel ngaite theihtawp chhuaha an bawhzui mek thu a sawi.

Dr R Lalthangliana hian Mizoram district hospital zawng zawng leh primary health centre 61 tana portable x-ray khawl, ECG khawl leh testing laboratory khawl bun a ṭul thu pawh a sawi a; hemi chungchangah hian NITI Aayog Adviser leh Boeing India hotute chuan ziaka thehlut turin thurâwn an pe a ni.