ZPM-in CT Scan bun mek an enfiah

ZPM party-a Vigilance department leh Media & Publicity department hruaitute chuan nimin khan Civil Hospital, Aizawla CT Scan kháwl thar bun tura hmalak dan a hmunah an enfiah. Kar khat liam ta, March 22, 2022 khan an lo enfiah tawh bawk.

ZPM thuchhuah tarlan danin, CT Scan dahna hmun tur chu chei ṭhat mek a ni a, earthing line pathum leh a chhuat siam zawh tawh niin, nimin khan ceiling siam zawh beisei a ni. Air conditioner (AC) hman lai chu kum khat vel a chhiat tawh avangin AC thar, 5 ton hman tura ruahman a ni.

AC hman/vuah tur chungchang chu ZPM party hruaitute chuan deputy medical superintendent Dr Thanchungnunga an zawtfiah nghal a; AC 5 ton chu Mizoramah lei tur a awm loh avangin phai aṭanga lei a ngai dawn a, quotation ti tura an inbuatsaih mek thu a lo hrilh.

ZPM thuchhuah chuan, Civil Hospital Aizawl chu mi harsate’n an pan khawm ber a nih avangin hun rei tak CT Scan hman theih loa a awm chu mipuiin an tuar nasa tih a tarlang a, “CT Scan hi a tlangpuiin thla khatah mi 300 velin an hmang anga ngaih a ni. CT Scan bakah kháwl hrang hrang hman man hi hmun dang aiin 40-50% velin a hniam zawk tlangpui a, tuna a rate hrang hrang en hian hei aia mipui tana zângkhai zawka tih theih niin kan ngai,” a ti.

CT Scan chu hman theih thuai a nih an beisei thu leh bun tura hmalak dan an en zui reng dawn thu ZPM party chuan an tarlang bawk.