Beichhua’n Lakher Pioneer Mission Humhalhna tur project a hawng

Social Welfare minister Dr K Beichhua chuan nimin khan Saikao khuaa Lakher Pioneer Mission hmunah Mara rama missionary-te hmunhma leh sûlhnû humhalhna tur, Preservation of Cultural Heritage project a hawng. Project atan hian Ministry of Tribal Affairs chuan cheng nuai 560 a pe a ni.

Dr K Beichhua chuan, “Tisa leh thlarau lama malsawmna min thlentu sap missionary-te hmunhma leh an sûlhnû humhalhna tur project sorkar laipuiin a pawm hi Saikao khua leh Mara ramin malsawmna kan dawn liau liau a ni,” a ti a; kum 2020 khan Mizoram aṭangin Ministry of Tribal Affairs-a project thehluh, Ministry-in a pawmpui pahnih a awm a, Preservation of Cultural Heritage project pakhat zawk a nih thu a sawi.

SEDP aṭanga sorkar hmalakna tarlangin K Beichhua chuan, “PWD department hnuaiah inkalpawhna kawngpui siam hna nasa taka thawh tawh a ni a, Education department hnuaiah zirtirtu indaih lohna phuhrûk nan SEDP kaltlangin zirtirtu ṭhahnem tak lak a ni tawh,” a ti.

Minister chuan, Social Welfare department kaltlangin SEDP Social Rehabilitation Board-in ruihhlo ngaite enkawlna tur Seṭhawnah Jordan Centre siamṭhat hna an thawh zawh tawh thu te, SEDP kaltlangin Transport department-in Aizawl tih loh district khawpui dangah ṭhalai eizawnna nei lote tan two wheeler taxi permit pek a tum thute a sawi bawk.