KHAWTHLIR

NSS-in thisen pe
Nimin khan Aizawl West College NSS chuan Civil Hospital, Aizawl (CHA) tan an college-ah thisen unit 75 an pe a, petute mipa 57 leh hmeichhia 18 an ni a; Hrangbana College NSS pawhin CHA tan thisen unit 39 pein, petute mipa 36 leh hmeichhia pathum an ni. Pachhunga University College NSS chuan nimin khan CHA leh Synod Hospital tan thisen an pe a; Synod Hospital tan unit 73 (mipa 41 leh hmeichhia 32) leh CHA tan unit 36 an pe a ni.

Ar notê sem
FOCUS project hnuaiah AH&Vety department chuan March 29, Thawhlehni khan Champhai district khaw 31-a mi 200 hnenah ár notê (rainbow rooster) 20 ṭheuh an sem a; ar chaw pekna, ar chaw kg. thum ṭheuh leh tui pekna an sem bawk.

Minister-in hmanpui
Kolasib College chuan nimin khan an multipurpose hall-ah College Week 2022 khârna inkhawm an hmang a, bialtu MLA K Lalrinliana, minister of state-in a hmanpui. K Lalrinliana chuan, leilung hausakna humhalh zawnga hmasawnna kalpui thiam a ṭul thu leh ram leh hnam tana ṭangkai tur ngaituah chunga zirna her rem thiam a ṭul thu a sawi.

Puanthui zirna khâr
USHA company, Bethany Society, Shillong leh AMFU Welfare Foundation-te'n hmeichhe dinhmun chawikanna atana puanṭhui zirna, Serkawn Sikulpuia an buatsaih chu nimin khan khàr a ni a, khàrna inkhawm hi Lunglei MJA president Laltlanthanga'n a hmanpui. Puanṭhui zir zo mi 25 hnenah Lunglei MJA President hian puanṭhui khawl a hlân nghal a ni.

VL Nghaka chhuang
Mizoram Hindi Prachar Sabha (MHPS) chuan thuchhuah siamin, MHPS dintute zinga mi leh president hmasa VL Nghaka'n 'Literature and Education' huangah President Ram Nath Kovind hnen aṭanga Padma Shri a dawng chu chhuanawm an tih thu leh an lawmpui thu an tarlang.