Cyber crime-a fimkhur turin mipui chah

Lunglei Sub Divisional Police Officer (SDPO) chuan phone call leh internet kaltlanga inbumna (cyber crime) laka fimkhur turin mipui a chah a, zawm tur thuchhuah a tichhuak nghal.

SDPO chuan, tunlaiin cyber crime a hluar hle tih tarlangin, “Mi tam takin thilpek leh sumdawnna lem avangin pawisa an chán tawh a, mi tam tak chu bank account aṭangin an pawisa rûksak an ni,” a ti a; zahmawh rawng kai thlalak leh thil dang hmuh nuam lo tak tak social media-ah a darh nasa tih a tarlang.

Cyber crime tuartu (victim) chuan police station-ah complaint (FIR) thehluh tur a ni a, police station pan a harsat chuan toll-free cyber crime helpline number 1930 emaw, National Cybercrime Reporting Portal (www.cybercrime.gov.in) ah online-in complaint thehluh theih a ni.

CYBER CRIME LAKA HIMNA TURTE
1) Bank-in phone call leh internet kaltlangin an customer-te bank account, ATM card leh net banking chungchang an zawt ngai lo, online-a siamṭha tur emaw tidanglam tur phei chuan an hrilh ngai lo.

2) Mobile phone-ah SMS-in one time password (OTP) number a thleng a nih chuan tu mah hrilh loh tur.

3) OTP a thleng sual ngai lo a, i phone-a OTP an rawn thawn sual anga an sawi chuan eng mah hrilh loh tur, bank account aṭanga pawisa rûk an tum tihna a ni.

4) SMS emaw, email hmanga lottery man thu emaw, hna emaw, thilthlawnpek emaw i dawng a nih chuan inbumna a ni tih hriat tur.

5) Social media-a i ṭhian siam chawp, ram dang miin thilpek pek che a tum a nih chuan inbum tumna a ni.