India rama Covid-19 vei hmuh thar tam lamah Mizoram 2-na a ni zui zel

March 29, Thawhlehni khan Mizoramah Covid-19 vei mi 157 hmuh chhuah a ni a, India rama state leh union territory 36 zingah Kerala dawta hmuh tamna ber a ni. Nimin khan hripui vei dam tawh mi 152 chhuahtir an ni a, Covid-19 vanga thi an awm lo.

Covid-19 vei hmuh tharte chu mipa 70 leh hmeichhia 87 an ni a; RAT hmanga hmuh 155 leh FIA hmanga hmuh pahnih niin, positivity rate 12.39% a ni. RT-PCR laboratory leh TrueNAT hmanga swab sample endik zingah positive a ni lo.

IDSP record angin, Mizoramah Covid-19 vei 2,24,261 hmuh chhuah a ni tawh a, mipa 1,04,556 leh hmeichhia 1,19,705 an ni a, mipa aiin hmeichhia 15,149-in an tam zawk. Nimin tlai dar 5 thleng khan mi 2,22,628 (99.27%) chhuahtir an ni tawh a, mi 684 (0.31%) thi tawhin, enkawl mek mi 949 (0.42%) an awm.

Nimin tlai dinhmun angin, Aizawl district chu hun rei tak hnuah Mizorama Covid-19 positive enkawl lai (active case) tamna ber district a ni tawh lo a, Serchhip district-ah active case an tam ber a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 2,24,261 chu mi 1,000 zelah hripui vei mi 204 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.

March 29 khan India ram pumah Covid positive mi 1,233 hmuh chhuah a ni a, Kerala-ah mi 424, Mizoramah mi 157 leh Maharashtra-ah mi 103 hmuh niin, state/UT dang zawngah 100 aia tlem vek hmuh a ni. Assam, Tripura, Meghalaya, Arunachal Pradesh, Sikkim, Puducherry, Dadra and Nagar Haveli and Daman and Diu leh Lakshadweep-ahte positive hmuh a ni lo.

Nimin zing lam dinhmun angin, Arunachal Pradesh, Dadra and Nagar Haveli and Daman and Diu leh Lakshadweep-ahte Covid-19 positive an awm tawh lo a ni.