Vairengte kaltlanga rawn lutte RAT-a endik chhunzawm turin sorkar ngen
Serlui biala Congress Ṭhalai Block chuan press statement siamin, Vairengtea Covid-19 screening point-ah state páwn aṭanga lirtheia rawn lutte Rapid Antigen Test (RAT) hmanga endik chhunzawm turin Mizoram sorkar an ngen.
Serlui Congress ṭhalaite chuan, Vairengte leh Lailapur inkara ramri buai vanga Assam lamah hun eng emaw chen lirthei dan a nih hnua kawngpui a tlang tirh aṭangin Vairengte screening point-ah lirthei khalhtu (driver) leh puitu (handleman)-te RAT hmanga endik an ni lo tih an tarlang.
"Ramri buai vanga lirthei tangkhang tam tak test loa chhuah huk leh ramri buai kal mek laia kan thil tumte thlirin, a àwm viau kan ti. Amaherawhchu, vawiin thlenga test loa essential leh non-essential phur driver leh handleman-te sorkarin a luhtir danah hian Covid-19 hi an hlau tak tak loah a ngaih theih a, sorkar hi sumah a tlachhe ta mai em ni? Mipui him nan Vairengte screening point-ah RAT chhunzawm nghal turin kan ngen," an ti.
An tarlan danin, RAT chungchangah mimala Mizorama lut turte'n test kit man Rs. 500 zel an chawi.
Hnam dangte bik chu RAT-a vawi khat an negative chuan ni 14 chhung test ngai tawh loin negative saa ngaih an ni. Ni 14 chhung chuan ni tin zalen takin Mizoram leh Assam an kàr tawn thei tawh a ni.
Covid-19 len ṭan tirh aṭanga sorkarin a kalpui angin, state páwn aṭanga Mizorama rawn lut turte chu sorkar quarantine facility-ah ni 14 chhung inkhung hrang leh ngei se an duh thu sawiin, "Inkhung hran ni 14 hnuah ni nga chhung home quarantine leh ni rawh se," an ti.