Mi pathum hâl hlumtu mi pahnih dam chhung táng tura hrem a ni

Champhai District Court-a additional sessions judge R Vanlalena chuan, mi pathum hâl hlumtu Singngaihsuta (57) leh a fapa Pausawmthang (28), Champhai Vengthar chu nimin khan dam chhunga jail-a táng tur leh Rs. 8,000 ve ve chawi turin a hrem.

Court thuremnnaa a lan danin, November 29, 2015 zanlai pelh tawhah Champhai Vengthara Ngongaihluni in, Assam type chu a kâng a, in kan lai hian a chhungah Haulamchingi leh mi dang pathum an awm. In a kan hnuah Ngongaihluni fanu Haulamchingi chu thoin, páwnah tlàn chhuah a tum a, páwn lamah kawngkhar kalh a nih avangin a chhuak thei lo.

An thâwm hriain an ṭhenawmpain kawngka a hawnsak a, Haulamchingi chu a tlàn chhuak a, mi dang pathum erawh chu chhan hman an ni lo a, an kâng hlum a ni.

He thil thleng hi Champhai police-te chuan an chhui zui a, in hâltu nia hriat Singngaihsuta leh Pausawmthang te chu an man nghal. An chhui chianna aṭangin Singngaihsuta te pafa hian îtsîk thilah in chu an hâl nia hriat a ni.

Court chuan police-te thil hmuh chhuah leh thuhretute thusawi a zir chian hnuah nimin khan thutlukna a siam a; Singngaihsuta leh Pausawmthang te chu dam chhung táng tur leh Rs. 8,000 ve ve chawi turin a hrem ta a ni.