State pawn aṭanga haw hlim ni lo NDRF mi leh sain Covid-19 vei

Aizawl khawpui dái, Lungverh hmuna National Disaster Respond Force (NDRF) mi leh sa Covid-19 vei zingah phai aṭanga rawn lut thar ni lo an awm a, chuvang chuan Lungverh leh Sairang Dintharah total lockdown puan a ni. NDRF mi leh sa Covid-19 vei chungchangah hian sorkar thuchhuak leh Lungverha YMA leh 5th IR hotute hriat dan inang lo a tam hle.

July 4, Inrinni khan Lung­verha awm 1st battalion NDRF (Echo) company mi leh sa 10 chuan Covid-19 an vei tih hmuh chhuah a ni a, an vai hian tun hnaia state páwn aṭanga rawn lut an ni. NDRF mi hripui vei hmuh chhuah an nih avang hian Lung­verha awm NDRF mi leh sa dangte pawh an swab sample ZMC labora­tory-ah endik a ni a, July 6, Thawhṭanni zan khan mi pangain hripui an vei tih hmuh chhuah belh a ni.

Mizoram sorkar thuchhuah tarlan dan chuan, NDRF mi leh sa Covid-19 vei hmuh chhuah thar mi panga zinga pali chu Madhya Pradesh, Andra Pradesh, Manipur leh Assam aṭanga rawn haw an ni a, pakhat chu an ardali (orderly) niin, positive contact aṭanga kai nia hriat a ni thung. Sorkar thuchhuah chuan, NDRF mi leh sate chu Aizawl West CMO aṭanga a hmuna endiktu hnenah quarantine lai angin an insawi niin a tarlang a, "Chutianga chhinchhiah chu an nih vangin QF (quarantine) lai anga tarlan an ni," a ti. "NDRF hi an vaiin mi 35, orderly Mizo pakhat tih loh chu hnam dang vek an ni a, 5th IR canteen-a châkkhai lama an kal zeuh tih loh chu mipui mimir nen inkalpawhna an nei tlem hle... Sorkarin a ṭul angin chak takin hma a la nghal a, mipui tan chîâina tur a awm lo," a ti bawk.

Hetih lai hian, Lungverha awm 5th IR police hotute chuan Vanglaini zawhna chhangin, Covid-19 veite chu state páwn aṭanga rawn lut hlim ni loa an hriat thu an sawi a, "An hming vel aṭanga kan enin, camp-a awmsa ni ngeiin kan hria a, phai aṭanga rawn hawte'n an kai a nih a rinawm," an ti. Lungverh YMA hruaitute aṭanga thu dawn danin, Lungverhah hian NDRF mi 31 an awm a, an zinga 20 chu June 27, 2020-a phai aṭanga rawn lut niin, mi 11 chu Lungverha awm sa an ni. Phai aṭanga rawn lut tharte swab sample endik a ni a, July 4 khan result chhuakin, mi 10-in hripui an vei tih finfiah a ni.

State páwn aṭanga rawn lut thar ni lo, Lungverha awm sa mi 11-te swab sample pawh July 5, Pathianni khan lâk nghal a ni a, Pathianni a nih avangin endik nghal a ni lo a, a tûk Thawhṭanniah endikin, mi panga chuan Covid-19 an vei tih hmuh chhuah a ni ta a ni.

Lungverh YMA hruaitute chuan, Mizoram páwn aṭangin NDRF mi an rawn lut tih hriattir an nih loh thu sawiin, "Report kan dawn loh avang leh an rawn haw hun hi inkhàrkhip thlahdul lai a nih tawh avangin keini lam pawh kan inthlahdul lai tak a ni. Phai aṭanga rawn haw NDRF mi leh sa an awm tih hi Covid-19 positive an awm thu puan a nih khan kan hre ve chiah," an ti. NDRF mi leh sate'n an khuaa dawr pakhatah thil an lei ve ṭhin tih sawiin Lungverh YMA hruaitute chuan, "An awmna hmun hi field panna kawng a nih avangin an inkhel tur kal lam leh haw lamah an kal pèl ṭhin a, ball lo pump-te pawh an awm. An chaw nâwi la ṭhinte pawh an awm," an ti a; NDRF-te chu police canteen-ah pawh an chawlh ve ṭhin thu an sawi. 

Lungverh YMA hruai­tute chuan, NDRF mi leh sa aṭangin an khaw mite zingah kai chhâwng palh thei an awma an hriat avangin nimin aṭang khan total lockdown an puan thu an sawi a; an khaw mi 37-te chu ZMC-a endik turin an swab sample lak a nih thu Vanglaini palai an hrilh. Hetih lai hian, Sairang Dinthar Veng chuan an veng mi leh sa police canteen, Lungverha tui pe ṭhin leh Lungverha hnathawk police pahnih an neih avangin nimin 

aṭang khan total lockdown an puang ve.

Vanglaini zawhna chhangin Sairang Dinthar Veng YMA hruaitute chuan, "Lungverha kal ṭhinte hi an swab sample an rawn la tawh a, an result azirin total lockdown chungchang chu kan rél ang," an ti. Lungverha awm mek 5th IR Batallion hotute pawhin phai aṭanga NDRF mi leh sa Covid-19 positive hmuh chhuah an awm avang hian a theih ang anga an inkharkhip thu sawiin, "Awmzia awm tawh lo mah se, a darh nasa zual tur tal chu ven theih a nih kan beisei vangin kan inkharkhip," an ti a, positive an awmin NDRF mi leh sa phai aṭanga rawn haw an awm tih an hriat chauh thu an sawi.