Green MJA Day hman a ni

Mizoram Journa­lists' Asso­ciation (MJA), Lawng­tlai district chuan nimin khan Green MJA Day an hmang a, district bawrhsap Dr Andrew H Vanlaldika'n a hmanpui.

Lawngtlai Press Club-a Green MJA Day hmannaah hian An­drew H Vanlaldika chuan, Lawngtlai MJA-te'n Green MJA Day hmanga thing an phun ṭhin leh an enkawl zui zel chu fakawm a tih thu a sawi a, "Journalist-te'n an chanchinbuah thu ziah mai piah lamah anmahni ngei che chhuaka mi dang tana zir tur leh entawn tur an siam ṭhin hi a hlu hle a ni," a ti.

Lawngtlai MJA president Lalngheta Ralte chuan, journalist-te chu sorkarin a hman ṭangkai thiam a ngai tih sawiin, "Sorkarin mipui tana an thawhte puang chhuaktu chanchinbu mite leh sorkar hi inhlat thei an ni lo," a ti a; sorkarin mipuia puanzar tur hmalakna a neihte puanzar kawngah IPR department leh MJA-te hmang ṭangkai deuh deuh se a duh thu a sawi.

Green MJA Day-ah hian Lawng­tlai DC office complex-ah thing ṭiak phun a ni a; MJA hruaitute chuan IPR office chhehvelah thing an phun bawk.

Nimin vêk khan Sports & Youth Services department hmalaknain Kolasib Sports Stadium complex-ah thing phun hnatlang neih a ni a, district bawrhsap Dr H Lalthlangliana leh SP Vanlalfaka Ralte ten an hman­pui. He hunah hian ashoka tree 50 phun a ni.