KHAWTHLIR

Manpower Development Board vice chairman Zothantluanga, MLA chuan November 21, Inrinni khan Mizoram leh Tripura inkalpawhna kawnga Langkaih lei dawh ṭhat  hawnna a hmanpui. Zothantluanga chuan Langkaih lei dawhṭhat chu Chief Minister-in a ngaih pawimawh thu sawiin, "Department lam pawhin rim taka hna thawk a, hun rei lote chhunga Lei dawh hna thawh zawh a ni ta mai hi Mizoram mipuite tan a lawmawm tak zet a ni," a ti.Lei hi metric ton 20-a rit dâwl zo tur a ni.

Telecom Advisory Committee chu nimin khan BSNL pisaah Lok Sabha MP C Lalrosanga leh Rajya Sabha MP K Vanlalvena hoin an ṭhu. C Lalrosanga chuan, Mizoram leh ram dang - Myanmar leh Bangladesh inrìna velah inbiakpawhna tihchangtlun a ṭul a tih thu a sawi. K Vanlalvena pawhin, mimal enkawl mobile service chhiatna hmun kilkhawr apiang luhchilh turin BSNL hotute chu a ngen. Tun dinhmunah BSNL-in Mizoramah telephone pangngai hmangtu 10,026 leh mobile phone hmangtu nuai 2.35 an nei a ni.

State Referral Hospital-ah nimin khan Covid-19 vei mi pathum dah luh an ni a, anni nen mi 46 enkawl mek niin, an zingah kum 60 chung lam mi 16 an awm. SRH-ZMC Bulletin tarlan danin, hripui vei SRH-a awm mek zinga pakhat chu ICU-ah enkawl a ni a, ventilator hmantir mek a ni. Isolation ward-a awm mi 45 zingah ngaihtuahawm lutuk an awm lo.

Aizawl North-II bialtu MLA Dr Vanlalthlana chuan November 21, Inrinni zan khan Ramthar North Branch YMA Library a hawng. Library hi Dr Vanlalthlana'n a MLA fund Rs 3,00,000 a pek hmanga siam a ni a; kum 2020-21 chhungin a bial chhungah specialised library pathum - entre­preneurship, central civil service leh competitive exam atana hman theih tura YMA library pakhat ṭheuh thuam a tum thu a sawi.