Lengpui Airport chim chhan chhui a ni lo 'Sorkar sum a hek phah dawn lo' - PWD

March 10, 2022 tlaia Lengpui Airport chei ṭhat hna thawh meka baggage make-up area (BMA) chim chhan chhui a ni dawn lo. PWD hotute chuan, BMA chim vang hian Mizoram sorkar sum a hek phah dawn lo tih an sawi.

Vanglaini palai zawhna chhangin PWD hotute chuan, BMA chim chhan chhui a nih dawn loh thu an sawi a, "BMA chim avang hian Mizoram sorkar chuan cheng khat mah a sên belh dawn lo. Contractor-in a siamṭhat hna a thawk nghal a, estimate siam belh a ni lo ang. Contractor erawhin a chawi belh nualin a rinawm," an ti.

Mizoram PWD hotute chuan, Airport-a BMA sak lai chim avangin thi an awm loh thu sawiin, "Nunna chán awm chu ni se, magisterial inquiry kalpui a nih ngei a rinawm," an ti a, BMA chim chuan mihringah thil pawi lian tham a thlen lo chu lawmawm an tih thu an sawi.

PWD hotute sawi danin, BMA chimin hna thawh tawh zingah nghawng chhiat theih a neih leh neih loh endik vek a ni dawn a, nghawng a neih chuan chu'ngte chu tihchhiat vek tur niin, contractor-in estimate hran siam chuang loin a siamṭha leh dawn a ni.

Iron rod hmante a nih tur ang a ni lo nia sawi chungchangah PWD hotute chuan, "An rod hman ṭhenkhat chu a len zawngah a nih dan tur anga lian tâwk lo a awm ngei. Mahse, an hman hmain PWD-ah an endiktir vek a, chakna a neih tur ang an nei vek a ni," an ti.

Tarlan tawh angin, Airport BMA chim chin chu sq.ft. 50 vel a ni a; a chim lai hian ni tin (daily)-a inhlawha hna thawkte chu an báng tawh a, hna thawktu tlem azawng erawh an la awm. Mi pahnih an hliam a, an na lutuk lo.

All Mizoram Cement and Iron Rod Dealer's Association chuan Lengpui Airport chei ṭhat mek chim chu March 13, 2022 khan an tlawh a; Quality Control of Cement and Iron Rod Committee hmalakna hmanga Mizoram sorkarin lak luh a phal loh mek leh BIS standard ni lo, iron rod len zawng (diameter) tling lo company brand pathum - SMS Durgapur, Trishakti Durgapur, Zeecon Durgapur-te hman a nih thu an tarlang.

Mizoram Mistiri Association (MMA) pawhin March 12, 2022 khan thuchhuah siamin, Lengpui Airport chei ṭhat meka hna thawhte chu a ṭha tâwk loa an ngaih thu an puang.

MMA chuan, Lengpui Airport chei ṭhat lai chim ta chu a hmunah an enfiah thu tarlangin, "Iron rod zawm dan leh cement proportion a dik tâwk lo a, tui a mamawh ang an pe loin kan hria a, chu chuan concrete chakna tam tak a tichhia a ni," an ti a; a ban leh beam, slab tlo dan tur angin a tlo dawn lo tih a chianga an hriat thu an tarlang.