Governor-in Union Power Minister hnenah kawlphethaa Mizoram harsatna tawh a thlen

New Delhi-a chám mek Governor Dr Hari Babu Kambhampati chuan March 30, Nilaini khan Union Power minister RK Singh chu a pisaah a kâwm a, kawlphethaa Mizoramin harsatna a tawhte leh sutkian dan tur a sawipui.

Governor chuan, Mizorama kawlphethaa harsatna hrang hrang sutkian a nih theihna tura hna thawh hmasak ṭul te, electric ban lian leh hruipui thlun belh a ṭul dan te, hydro electricity project thar siam belh ṭulna leh ni zung chakna hmanga electric current tam zawk siam dan turte a sawipui a ni.

Mizoram Power & Electricity department-in sorkar laipuia project pawimawh zual a thehluh tawh chungchang leh project-te kalpui a nih thuai theihna tura sanction tih thuai ma­mawh a nih dante sawiin Larsap chuan, "Mizo­ramah lui luang chakna hmangin kawlphetha tam tham tak siam theih a ni,“ a ti a, kawlphethaa Mizoram harsatnate a hmunah ena zin turin a sáwm bawk.