Kum 2023-a sorkar leh turin mipuiin MNF-ah rinna an nghat nasa - Zoramthanga

MNF president Zoramthanga chuan, kum 2023 inthlanpuiah MNF an sorkar leh ngei dawn nia sawiin, mipuiin MNF-ah rinna an nghah thu a sawi.

Nimin khan Lungleia Mizo Hnam Rûnah thu sawiin Zoram-thanga chuan, "Kum 2023-a sorkar leh tura rinna siam leh bengkhawn kawngah mipuiin MNF-ah rinna an nghat nasa hle. Tun din­hmunah party dangin sorkar­na an siam ringa dahkham dah ngam an awm meuhin a rinawm loh. SEDP hmanga hmalakna lian tham bul kan ṭan chhoh mek hian mi dang a tizâm viau," a ti.

Zoramthanga chuan, ZPM kalphung thar chu anmahni'n an thlâk zung zung avangin mi tam takin party-a inleh avangin rinna nghah har an ti niin a sawi a, "Hmana Pu Duha tho kha vawiina Pu Duha hi a la ni," a ti. Congress party chungchangah, "Congress down lutuk hi a buaithlak a, dahkham chawi fur an ni ang tih hi a hlauhawm zawk," tiin, an beidawnna a kal tluan zel chuan artelukawn an hlat lo niin a sawi.

BJP chungchang pawh sawiin Zorama chuan, "Mizoram BJP lahin an pute hnenah min hêk ngial mah se, kan Assembly House-ah ngei an pu, India Vice President chuan kan sorkar fakna a rawn sawi a, Central-in kan sor­karah rinna an nghat mai ni loin, duhsaknain min vûr mek zel," a ti.

MNF President chuan, Mizo­ram malsawmna hâi chhuakin, Pathian leh kan ram tan tiin an bei zel dawn tih sawiin, "Hman ata ram leh hnam tana kan engkim kan hlan ngam angin kan bei zel ang," a ti a, Pathianin kawng laklawhah a kalsan dawn lo a, varparh arsi a eng zual zel dawn niin a sawi.

Inkhawmah hian MNF Pre­sident hian páwl hrang hrang aṭangin MNF party zawm thar mi 273 a lawm lut niin MNF thuchhuah chuan a tarlang a; MNF adviser pahnih - C Lalrinsanga leh Lalruatkima ten thu an sawi bawk.