Survey on Higher Education thlirho

Nimin khan Hotel Regency conference hall-ah All India Survey on Higher Education 2019-20 report thlirhona hun hman a ni a, Higher & Technical Education Board vice chairman Dr Vanlalṭanpuia, MLA-in a hmanpui.

Dr Vanlalṭanpuia chuan, Gross Enrolment Ratio (GER) 2019-20 thar bera a lan danin, Mizoram GER chu 25.7 a nih thu a sawi a, “National GER average chu 27.1 a ni a, Mizoram hi India ram state zingah ziak leh chhiar thiam tamna, literacy rate sanna ber state zinga mi a ni a, ṭhalai kum 18-23 inkar higher studies-a inziak lut an tlem em em anga report a lang hi en zui ngai tak a ni,” a ti.

GER data chuan khawpui leh thingtlanga zirna rualkhai taka kalpui dan tur leh zirtirtu sem rual dan tur te, sorkar sum hman dan tur thlengin a nghawng dawn tih sawiin Vanlalṭanpuia chuan, “A kaihhnawih department, a bik takin School Education leh Higher & Technical Education department-te bakah, mimal researcher-te’n ngaihtuahna nasa zawk an sên a ṭul,” a ti bawk.

He hunah hian Human Resources Development Board vice chairman L Thangmawia, MLA leh HTE joint director Lalṭanpuia te pawh an tel a ni.