Thangtea'n sorkar laipui a dàwr chhunzawm

New Delhi-a chám mek minister Dr R Lalthangliana chuan nimin khan sorkar laipui hotute a dàwr chhunzawm a, a department atana hmasawnna turte a sawipui. Minister hi Rajya Sabha MP K Vanlalvena'n a ṭawiawm a ni.

Dr R Lalthangliana hian Union Finance secretary TV Somanathan hnenah Mizorama micro-enterprise, sumdawnna tênau nei ho Covid-19 vanga harsatna lian tak tâwkte ṭanpuina leh chhawmdawlna tur chungchang December 2021-a a thlen tawh chu a thlen nawn leh a; Union Finance Secretary chuan PM Special Package aṭanga ti turin hma a la dawn tih a lo hrilh.

MSME secretary BB Swain nen an inkawmnaah R Lalthangliana chuan, MSME hnuaia Mizoram tana scheme thara hmalakna tur chi hrang hrangte a sawipui.

Dr R Lalthangliana'n scheme thar a sawi lante chu - Development of Roads in IGC (Luangmual), Solar Plant and Power Distribution Network in IGC (Luangmual), Construction of Flatted Factory Complex in IGC (Luangmual), Development of Roads in EPIP (Lengte), Solar Plant and Power Distribution Network in EPIP (Lengte) leh, Construction of Flatted Factory Complex in IIDC (Pukpui)-te a ni.

Minister hian Tribal Affairs secretary Anil Kumar Jha pawh a kâwm a; nikuma Tribal Affairs Ministry hnena Proviso to Article 275(1) tlawhchhana Mizorama health sub-centre hrang hrang tihchangtlunna tur cheng vbc. 14.44 hu project a thehluh tawh chungchang a sawipui.

Anil Kumar Jha chuan, Union Minister hnenah a rang thei ang bera a sawipui tur thu a sawi a, sorkar kum thar 2022-23 atana ngaihtuah chhunzawm a nih tur thu a lo hrilh.

R Lalthangliana hian Ministry of Home Affairs (Border Management) secretary Dr Dharmendra Singh Gangwar leh BRO director general Lt.Gen. Rajeev Chaudhry pawh kâwmin, Darzo kai (Tuipui-D), Hnahthial district-a lei (bridge) sei dawh chu Lawngtlai district leh Siaha district-te nena inkalpawhna atana kawng pawimawh a nih avangin harsatna siam loa a rang thei anga tihhlawhtlinsak turin a thlen a ni.