ASF vangin vawk 30,208 thi tawh

Vawk pùl hri, African Swine Fever (ASF) vangin nimin khan Mizoramah vawk 12 a thih belh leh a, kumin 2022 bikah khua/veng 24-ah ASF vangin vawk 384 a thi tawh. March 2021 aṭanga nimin thlenga Mizorama ASF vanga vawk thi tawh zat chu 30,208 a ni.

March 2021 leh December 30, 2021 chhung khan Mizorama khua/veng 272-ah ASF vangin vawk 29,824 a thi a; ni 35 chhung ASF vanga vawk thi a awm loh hnuah, February 4, 2022 khan ASF vanga vawk thi Champhaiah a awm leh ṭan a ni.

February 4, 2022 khan Champhai Electric Vengah ASF vanga vawk thi nia rinhlelh a awm a, zir chian a nih hnuah ASF vanga thi a ni tih March 7, 2022 khan finfiah a ni. Kumin February 4 aṭanga nimin thleng khan Champhai Electric Vengah ASF vangin vawk 64 a thi tawh.

AH&Vety tarlan danin, kumin February 4 aṭanga nimin thleng khan Aizawl district-a khua/veng 11-ah ASF vangin vawk 229 a thi tawh a, Lunglei district-a Chhûmkhûm khuaah vawk pahnih, Champhai district-a khaw parukah vawk 109, Kolasib district-a khaw paliah vawk 39 leh Saitual district-a khaw pahnihah vawk panga a thi tawh bawk.

ASF hri kumina a lên thar leh hnua ASF vanga vawk thi tamna ber, Aizawl district-a Sakawrdai khuaah chuan February 23, 2022 khan vawk thi a awm ṭan a, March 7, 2022 khan ASF vanga thi a ni tih finfiah niin, nimin thleng khan vawk 134 a thi tawh a ni.