Aizawl-Zampui inkara MST bus tlàntir dan turah inráwnkhawm

Mizoram leh Tripura inkara khualzin bus tlântir tum chung changah March 30, Nilaini zan khan Vanghmun, Tripura-a Eden Tourist Lodge-ah transport minister TJ Lalnuntluanga hoin inràwnkhawmna neih a ni. Minister chuan, Zampui tlang­dunga Mizoram State Transport bus tlân tura ruahman fel a ni chu lawmawm a tih thu a sawi.

TJ Lalnuntluanga chuan, MNF a sorkar tirh aṭangin Mizoram leh Tripura inkara bus tlantir turin an inbuatsaih tih sawiin,"Hmun hrang hranga Zo fate leh Aizawl inkar hi hnai se kan duh. Harsatna hrang hrang karah theihtawp kan chhuah mek a, pheikhai rual taka ke pênpuiah chhak, thlang, chhim, hmara Zo fate kan sáwm a, Pathian zarah kan hlawhtling ngei ang tih kan ring," a ti.

Transport Minister chuan, Chief Minister-in a ngaih pawi­mawh avangin Aizawl leh Zampui inkara MST bus tlân tur an lei thei tih sawiin, "Zo fa, Zoram páwna mite hian ngaihsaktu, duhsaktu in nei a ni tih inhriat kan duh," a ti a; Zo fa ṭhendarha awmte tan Zoramthanga sorkar a ding tlat zel dawn tih a sawi.

Aizawl leh Zampui inkara MST bus tlân tur chu 'Hnam inpumkhatna bus' tia vuah a ni a; Nilainia inràwnkhawmnaah hian Central YMA president R Lalngheta, MZP president Lalnunmawia Pautu, MSU president J Lalmuanzuala, ZORO Ṭhalai president L Ramdinliana Renthlei, Mizo Convention president Lalrawntlinga Sailo, YMA Tripura Group president Lalnunfima leh Transport director R Lalrammawia te pawh an tel a ni.