MJA hruaitu mawhphurhna inhlân
Kum 2022-2024 chhunga Mizoram Journalist Association (MJA) General Headquarters hruaitu atana thlan thar leh hruaitu ni mekte chuan nimin khan Aizawl Press Club-ah mawhphurhna an inhlân.
MJA president kal chhuak Zonunsanga Khiangte chuan, president a nih chhunga a thawhpui leh MJA member-te hnenah lawmthu sawiin, "Hruaitu tharte hi hruaitu ṭha tak an ni dawn a, theihtawpin i ṭawiàwm tlang zel ang u. Hruaitu tharte pawh thawhpui theih, ṭawiawm theiha an awm a ṭul," a ti.
MJA president thar C Lalrambuatsaiha chuan, amah ring ngama thlang tlingtu zawng zawng hnenah lawmthu sawiin, "MJA hi India ramah journalist anga inhlâwm ṭha ber kan ni. Min thlang tlingtute tan ni loin, MJA tan, kan ram leh hnam tan kan theihtawpin kan thawk ang," a ti a; MJA zahawmna vawnghim a, hma a sawn zel theih nan theihtawp chhuahpuiah MJA member-te a sáwm.
Tarlan tawh angin, March 24, 2022-a Dawrpui Multipurpose Hall-a MJA General Conference-ah kum 2022-2024 chhunga MJA president atan C Lalrambuatsaiha (The Aizawl Post), vice president-ah Lalremsiama (Zawlkhawpui) leh treasurer-ah C Lalhmachhuana (Youth Herald)-te thlan an ni.
Nimin khan MJA president C Lalrambuatsaiha chuan general secretary atan Lalrinmawia Sailo (Thlirtu) leh secretary atan Lalnunzira Chawngthu (DDK), Joseph Lalnuntluanga (Zorin) leh K Zothanpara (Vanglaini) te a ruat.