KHAWTHLIR

Thisen pe
KṬP, Luangmual Branch chuan nimin khan an kohhran hall-ah thisen pek an huaihawt a, mipa 30 leh hmeichhia pathumte'n Civil Hospital, Aizawl tan thisen unit 33 an pe. Nimin vek khan Pachhunga University College NSS chuan MZU Sports-a an champion lawm nan Aizawl Civil Hospital-ah thisen an pe leh a, mipa 26 leh hmeichhia 25-te'n unit 51 an pe. Hrangbana College NSS pawhin Synod Hospital tan thisen unit 24 an pe a, petute mipa 14 leh hmeichhia 10 an ni. PUC leh HBC-te hian March 30 khan an lo pe tawh bawk.

Phúrâ PHC hawng
Minister of state Dr K Beichhua chuan nimin khan Phúrâ khuaa primary health centre (PHC) sak thar a hawng a, printer pakhat a pe nghal. Phura PHC hi NABARD sum nuai 140.21 hmangin Zamzo Construction & Consultancy Services-in an sa a; a hawnna inkhawm zawhah a thláwna inentirna buatsaih niin, damdawi sem nghal a ni.

SDGs zirho
Planning & Programme Implementation department leh Aizawl DC office chuan nimin khan Taxation depart­ment auditorium-ah Sustainable Deve­lopment Goals (SDGs) 17 zirhona, 'Implementation, Monito­ring and Locali­sation of SDGs' an buatsaih a, Aizawl district chhung, AMC páwn lama village council, tlawmngai pawl leh stake holder aiawhte an tel.

IPR Director thlah
Information & Public Relations (IPR) director Lallianpuii, MIS chu nimin khan superannuation pension-in a chhuak a, IPR department-a thawkte'n an audito­rium-ah thlahna hun an buatsaih. Lallianpuii hi kum 1983 aṭangin IPR department-ah a thawk ṭan a, June 1, 2019 aṭangin Director a ni.

Poshan Pakhwada
Women & Child Development chuan nimin khan Kolasib-ah Poshan Pakhwada hnuaiah 'Cooking Competition for Women Focusing on Traditional Foods for Mother & Child' an buatsaih a; Kolasib khawpui chhung bakah, Kawnpui, Bualpui, Bilkhawthlir leh Zanlawn aṭangin mi 12 an tel.