Khawzawl district-ah e-District kaltlangin certificate 2,287 pe tawh

Khawzawl district-a Common Service Centre Village Level Entrepreneur (CSC VLE)-te chu district bawrhsap CC Lalchhuangkima kaihhruaiin nimin DC conference hall-ah an ṭhukhawm. Khawzawl district-ah e-District kaltlangin certificate 2,287 pek chhuah a ni tawh tih tarlan a ni.

CC Lalchhuangkima chuan, e-District kaltlanga certificate pek chhuahah VLE-te’n mawhphurhna sang tak an nei tih sawiin, “Tribal certificate leh residential certificate phei chu a nei thei dik takte chauhin an neih theih nan fimkhur takin dilna lo lutte endik ṭhin ang che u,” a ti a; Khawzawl district chu CSC 2.0 scheme-ah pilot district atan thlan a nih thu a sawi.

Ṭhutkhawmah hian CSC kalphung tlangpui inhrilhfiahna chanchinbu leh social media-a tarlan theih tur chu DC Office-in buatsaih se, an ti a; certificate dilna fee sorkara chhûn luh tur lâk khawm nghal a ni bawk. Khawzawl district-ah hian CSC VLE pasarih a awm mek a ni.