PEAM-in theihtawpin hma an la dawn

Provisional Employee’s Association of Mizoram (PEAM) chuan thuchhuah siamin, an chanvo hrènsakna lâk kian a nih ngei theih nan leh New Pension Scheme (NPS) an hmuh ngei theih nan theihtawp chhuahin hma a la dawn tih an tarlang.

PEAM chuan, hma an lakna turah hian Mizoram puma an member, provisional employee zawng zawngte chu PEAM General Headquarters thuchhuak ngaichâng a, thuchhuakte zâwm ṭheuh turin an chah a ni.

PEAM hian austerity measure hmanga Mizoram sorkarin provisional employee-te regularization scheme kum hnih dáwn a dansak chu phelh turin sorkar hotute vawi eng emaw zat an dàwr tawh a; sorkar kar nan mass casual leave pawh an la tawh a ni.

Chumi hnuah Chief Minister-in a pisaah inhmuhna hun a siam a, Finance Secretary-te nen an thil phût chu sawiho a ni tih sawiin PEAM chuan, “Thu tihtluk nghal rum rum theih a nih loh avangin kan CM hian Finance department lam nen sawiho turin min thlah a, thla khat a vei hnuah pawh sawiho tura inkoh chu sawi loh, Finance Secretary hian appointment kan dil vawi nga min hnâwl fithla tawh a. Sawiho pawh awm loin Finance department chuan March 28, 2022 khan provisional employee-te lakah notification (No.G.17014/4/2019-FEA/161) thar an rawn chhuah leh si a ni,” an ti.