Vapar-ah se in leh tui pekna hawng

Fostering Climate Resilient Upland Farming System in the North East (FOCUS) project kaltlanga AH&Vety department-in Vapàr khaw rama se (sial) vulhte hman tur hmun siam thar chu nimin khan Champhaia DVO Dr B Zonghinga’n a hawng. Thil hawn tâk hi se in, tuikhur leh vênbûkte a ni.

AH&Vety department chhinchhiah danin, Champhai district-ah hian khaw 20-ah sial 2,000 chuang vulh mek a ni a; Vaparah hian se vulh chhungkua pasarihte’n sial 72 vel an vulh mek a, kum 30 kal ta aṭangin an vulh ṭan a ni.

FOCUS hnuaia ‘Mithun Shelter Community Level and Water Supply Facility for Grazing Area’ (se in leh tui pekna) tih project hmangin sorkar kum 2020-21 chhung khan Champhai district-a khaw pariat - Farkawn, Samthang, Vangchhia, Sazêp, Lianpui, Khuangléng, Hnahlan leh Tualchéng bakah, Khawzawl district-a Vangtlang leh Saitual district-a Kàwlbêm khuaahte se in leh tui pekna hawn a lo ni tawh.

Kum 2021-22 chhungin Champhai district-a khaw panga - North Khawbung, Khuangphah, Vapàr, Ruantlang leh Vaphaiahte se in leh tui pekna siam leh a ni a; North Khawbung, Vaphai, Ruantlang leh Khuangphaha mite hawn tawh niin, nimin khan Vapar khuaa mi hawn a ni leh ta a ni.

Se vulhna khuate hnenah hian se tlatna hmun a ṭul anga hungna turin thîr hlíng nei hlûm 120 ṭheuh pek mek a ni bawk.