Positive enkawl lai 879 (0.39%) chiah an awm

March 30, Nilaini khan Mizoramah Covid-19 vei mi 99 hmuh chhuah a ni a, positivity rate 7.76% a ni. Nimin khan hripui vei dam tawh mi 169 chhuahtir an ni a, Covid-19 vanga thi an awm lo a; positive inenkawl lai mi 879 (0.39%) chiah an awm tawh.

Covid-19 vei hmuh thar mi 99-te chu mipa 38 leh hmeichhia 61 an ni a; RT-PCR laboratory-a hmuh pakhat, TrueNAT hmanga hmuh pali, RAT hmanga hmuh 93 leh FIA hmanga hmuh pakhat a ni.

IDSP record angin, Mizoramah Covid-19 vei 2,24,360 hmuh chhuah a ni tawh a, mipa 1,04,594 leh hmeichhia 1,19,766 an ni a, mipa aiin hmeichhia 15,172-in an tam zawk. Nimin tlai dar 5 thleng khan mi 2,22,797 (99.30%) chhuahtir an ni tawh a, mi 684 (0.31%) thi tawhin, enkawl mek mi 879 (0.39%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,24,360 chu mi 1,000 zelah hripui vei mi 204 an awm ang a ni a; mi 1,00,000 zela Covid-19 vangin mi 62 an thi tawh ang a ni tih sorkar thuchhuakin a tarlang.

March 30 khan India ram pumah Covid positive mi 1,225 hmuh chhuah a ni a, Mizoram aia hmuh tamna state pathum - Kerala, Maharashtra leh Delhi-te awmin, state leh union territory dang zawng chu Mizoram aia hmuh tlemna vek a ni.

Assam, Puducherry, Lakshadweep, Andaman And Nicobar Islands leh Dadra and Nagar Haveli and Daman and Diu-ahte positive hmuh a ni lo.