Mizoramah Rualbanlote Ni hman a ni

Nimin khan rualbanlote ní, Inter­national Day of Persons with Dis­abilities a ni a, Mizoramah pawh hmun hrang hrangah hman niin, Aizawlah chuan Social Welfare, SSA, RMSA, SCERT, Health department leh NILD-NERC huaihawtin Zarkawt Recreation Centre-ah hman a ni.

Aizawla International Day of Persons with Disabilities hawnna inkhawm hi Social Welfare director Laldikkimi'n a kaihruai a; khuallian Social Welfare secretary K Vanlalrawni leh SSA & RMSA state project director Lalhmachhuana ten thu an sawi. Aizawl leh a chhehvela rualbanlote enkawlnaa awmte leh thawktute an kal khawm a ni.

Hawnna inkhawm zawhah intih­hlimna chi hrang hrang buatsaih a ni a; wheelchair race, spoon race, three legged race, football leh relay race-te hmangin intihhlimna hun hman niin, kawng hrang hranga rual ban lohna neite'n nuam an ti hle.

Lungleiah chuan Rualbanlote Ni hi SSA, RMSA leh Social Welfare department huaihawtin Cultural Heritage Centre-ah hman a ni a, Lunglei DC Dr Ankita Chakravarty-i'n a hmanpui. Lunglei district-ah hian rualbanlo 673 an awm a; intihhlimna chi hrang hrang buatsaih a ni.

Dr Ankita Chakravarty chuan, "Mipui mimirin rualbanlote kan en dan ah hmasawnna tur kan ngah a, hmusit leh enhrang mai loin, angkhata kan en a ngai a, ṭanpui an ngaihna laiah ṭanpui a, dâwm kâng tura ṭan lak a ngai," a ti.

Kolasib-ah chuan St. Joseph's Parish Hall-ah hman a ni a, Kolasib DC Dr Arun T-a'n Mizorama a hmasa ber tur, khaw hmuh lama harsatna neite (visually challenged) tana buatsaih braille textbook a tlangzarh.

Kolasib-a Rualbanlote Ni hmannaah hian sikul hrang hranga zirlai te, Kolasib district-a School Education department (RMSA leh SSA), Social Welfare depart­ment-a thawkte leh department hrang hranga hotute an tel a; Salvation Army Home for the Blind leh Mizoram Peoples’ Forum aiawhte'n an hmanpui bawk. Chawhnu lamah vohbikte tan intih­hlimna chi hrang hrang buatsaih a ni.

Serchhipah pawh Rualbanlote Ni hi RMSA leh Zoram Entu Pawl ṭangkawp buatsaihin Marian Hall-ah hman a ni a, Serchhip district education officer (DEO) Lawmawma'n a hmanpui.

Inkhawm hi Margaret Vanlalnghaki, CBRW-in a kaihruai a; Block Disable People Organisation secretary PC Lalromawia'n report a pe. Kum 2017-18 inkara rualbanlo mi 10 thite sûnna hun hman a nih bakah, Serchhip district chhung khaw hrang hrang aṭanga kal khawm rualbanlote'n an thiam thil chi hrang hrang an entir a ni.

International Day of Persons with Disabilities-in a tum ber chu, pian­phunga rualbanlote en hrang lo a, pheikhai rual taka kawng tinrenga an tel vena tura dâwm kân leh tihchak a ni a; kumina Day thupui chu 'Empowering persons with disabilities and ensuring inclusiveness and equality' tih a ni.

Kum 2011 chhiarpui ang chuan, Mizoramah pianphunga rualbanlo mi 15,160 an awm a ni.