Mizorama hripui vei tawh zat mi 197 Vawi hnih endika fihlim tawhin a vei

July 6, Thawhṭan­­ni khan Zoram Medical College (ZMC) laboratory-ah Covid-19 hripui vei mi paruk hmuh chhuah belh a ni. Mi paruk zinga pakhat, Siaha district nula chu vawi thum endiknaah hripui vei tih hmuh a ni a, a hmaa vawi hnih endiknaah a fihlim ve vea hmuh a ni.

Mizorama hripui vei hmuh chhuah tawh zawng zawng chu mi 191 an ni a, an zinga mi 58 (29.44%)-in vei mekin, mi 139 (70.56&) chu damin an chhuak tawh. Hripui vei hmuh thar paruk zinga pakhat erawh chu Siaha district nula a ni a, kum 23 mi, Delhi aṭanga June 1, 2020-a rawn haw thleng a ni. A rawn haw tirh aṭanga quarantine facility-a awm a ni a, Covid-19 symptom a nei lo. Amah hi RT-PCR hmangin a swab sample vawi hnih endik a ni tawh a, endikna hmasa pahnihah chuan Covid-19 a vei lo tih hmuh ve ve a ni.

Siaha district nula chuan zawhna chhangin, June 1-ah Mizoram an rawn thleng tih sawiin, "Vawi hnih ka swab sample endik a ni tawh a, a ṭha ve ve. Quarantine centre-a ka awmpui zingah June 30 khan positive hmuh chhuah a nih avangin July 2 khan ka swab sample an la leh a, vawi thum endiknaah ka positive ve ta a ni," a ti a; June 1 aṭanga khung hran an nih hnuah a la chhuak lo a, quarantine centre-ah a la awm char char thu a sawi. 

ZMC laboratory-ah hian Thawhṭanni khan mi 49-te swab sample endik a ni a, zanah result tihchhuah a ni. Hripui lakah mi 43 an fihlîm laiin, mi parukin an vei tih hmuh a ni. Covid-19 vei lo tih hmuhte zingah hian Thenzawl mi, tun hnaia rinhlelh vanga contact tracing tih aṭanga endik tura tihte pawh an tel. July 6-a ZMC-a endikte chu - State Referral Hospital (SRH)-a awm sa mi pasarih (M-3, H-4), Aizawl district mi 29 (M-19, H-10), Ser­chhip district mi 12 (M-7, H-5) leh, Siaha district mi pakhat (hmeichhia) an ni.

Thawhṭannia Co­vid-19 vei hmuh chhuah thar mi paruk zinga pa­nga chu Aizawl district-a awm, kum 30-54 inkar mipa vek an ni a, sorkar thuchhuah tarlan danin, National Disaster Response Force (NDRF) mi, Lungverha awm an ni. An zinga pali chu Assam, Manipur, Andhra Pradesh leh Madhya Pradesh aṭanga tun hnaia rawn lut an ni a, pakhat chu Mizorama awm sa NDRF ardali (orderly) a ni.

Sorkar thuchhuah chuan, NDRF mi pangate chu quarantine facility-a awm lai mek an nih thu leh Covid-19 natna lan chhuah dan anga awm (symptom nei) an awm loh thu a tarlang. Sorkar thuchhuah chuan, Covid-19 vei Lawngtlai district mi pa­hnih, state pawn aṭanga an rawn haw kawnga Thenzawla Jon Jon Res­taurant-a an chawlh vanga rinhlelh thila Thenzawl mi 12-te swab sample endikna result a ṭha a, an vaiin an negative tih a tarlang. Chutih rualin, Thenzawl mite hi ni nga hnuah endik nawn leh tura ruahman a ni.