Krismas pualin thisen pe
Association for Voluntary Blood Donation (AVBD) chuan, blood bank-te nena ṭanghoin nimin aṭang khan Aizawl Civil Hospital leh Synod Hospital blood bank-ah Krismas puala thisen pekna hun an buatsaih ṭan.
Aizawl Civil Hospital (ACH) medical superintendent Dr KL Remsanga'n a hawng. Hawn a nih hnuah mi eng emaw zatin Krismas thilpek atan thisen an pe nghal.
ACB Blood Bank-a hawnna inkhawm tâwi hi AVBD president C Lalnunnema'n a kaihruai a; ACH medical superintendent Dr KL Ramsanga chuan, thisen mamawh an tam hun, Krismas vuakvetah AVBD-in Krismas puala thisen pek hun an buatsaih chu lawmawm a tih thu a sawi.
Dr KL Remsanga chuan, "Krismas vuakvêtah hian thisen mamawhna a nasa ṭhin a, mi kan buai thla a nih avangin duh angin thisen kan ngah tâwk lo fo. Kuminah hian Krismas puala thisen pek, pawl anga huaihawt tum thâwm kan la hre chiah lo a, chutiang a nih laia AVBD-in ruahmanna an siam hi a lawmawm hle a ni," a ti a; Mizo ṭhalaite chu Krismas thilpek atana thisen pe ngei turin a sáwm.
AVBD hian blood bank-te nena ṭanghoin December thlaah Krismas puala thisen pekna hun an buatsaih ṭhin a; kuminah pawh buatsaih lehin, December thla chhung zawng an buatsaih dawn. Thisen pe apiangte chu ei leh in tuihnái hlui zel a ni a, HDFC Bank-in an tumsak tui pâina ṭha tak an pe zel a ni.
AVBD hruaitute chuan, Krismas vuakvetah mi tin an buai a, pawl hminga thisen pe an awm tlem hle ṭhin a, chutih laiin, Krismas vuakvet hi thisen mamawh a tam lai tak a ni thung si tih an sawi a; Mizo ṭhalaite'n pawl anga blood donation camp an huaihawt tam loh avang leh, thisena mihringte tlantu Lal Isua piang lawm nana mi nunna chhanna tura thisen pek chu Kristiante tih âwm tak a nih avangin kum 3 vel kal ta aṭang khan Krismas pualin thisen pek hun an buatsaih ṭhin tih an sawi bawk.
AVBD chuan Mizo mipuite chu mi dangte tana malsawmna ni tur leh Isua piang lawm nana thisen pe vek turin an sáwm a; thupui chu 'Show Love, Donate Blood' tih a ni. Nimin bikah chuan ACH Blood Bank-ah chuan mipa 20 leh hmeichhia pariatte'n thisen an pe a ni.