Kalphung tharin kan kal nghal - Lalduhoma

Zoram Peoples' Movement (ZPM) chief ministerial candidate Lalduhoma chuan, Mizoram Assembly inthlan neih zawh takah seat 26 an lak a rin thu a sawi a, "Inthlan campaign-naah ZPM chu kalphung tharin kan kal nghal a ni," a ti.

Lalduhoma hian nimin khan ZPM pisaa inkhawmah ZPM chuan campaign-na atan neih ang ang an thawhkhawm thu sawiin, "Kan thawhkhawm campaign-na atana kan han theh chhuah vete pawh an hman bâng an rawn kîr leh a ni. Political party dang worker-te chuan campaign sum hi inhlawhfâkna atan an hmang ṭhin," a ti a; ZPM chu sum leh pai léng vel karah pachhe taka an awm thu a sawi.

An khingpuite'n flag târ tam leh sawhchhiar siam an uar hle tih sawiin Lalduhoma chuan, "Sawhchhiar nena mi dang an rîk hut hut laiin kan mi leh sate chu rilṭámin an campaign a, tih tak takna leh tumruhna lamah chuan min pha lo hle," a ti.

ZPM CM Candidate chuan, an khingpuite campaign office-ah chuan zu ruite zaiin an lâm nasa nia sawiin, "ZPM chuan campaign office-a ṭawngṭai rual kan uar thung. Pawisa beisei, vote thlak lawk duh lote an awm a, lo lei tumin pawl dangte chu an duty a ni. Keini chuan pawisa pawh kan nei lo a, nei mah ila kan ti duh lo," a ti a; tun hnuah pawisa beiseia vote thlak lawk duh lote tumahin pawisa pe tawh lo se a duh thu a sawi.

Lalduhoma chuan, ZPM chu campaign danah kal­phung thara an kal thu sawiin, "Kan kalphung hian Zoram a la siamṭha ang. Politics hi thiang­hlim takin a khelh theih a, thlarau lamah pawh kan hlâwkpuina tur hmun a ni tih kan lantir mek a ni," a ti.

Assembly inthlan zawh takah ZPM chuan seat 26 an lak a beisei thu sawiin Lalduhoma chuan, "Seat 26 kan la ang a, a mihring erawh 25 kan ni ang. Boruak kan thlir vel hian kan sorkar dawnin ka hria," a ti a; ZPM chu mi zawng zawng lenna, party tih bik nei lo a nih thu a sawi.

Lalduhoma chuan ZPM kal dan tur chungchang sawiin, "A rang thei ang bera ZPM constitution siamṭhat a ṭul. ECI-ah registration buaipui leh thuai a ngai. Lungrual leh inpawhtlang taka kan kalho zel hi he ram leh hnam tan hian a pawimawh tak zet. Nihna leh sum leh paiah kan buai tur a ni lo. Party dang aṭanga min lo zawm tharte pawh an pawl hlui kalphung leh zia rawn chhawm lut lo turin kan chah lâwk duh," a ti.