Kan sorkara kan tih hmasak ber tur chu Bamboo link road laih a ni - Zoramthanga

MNF party chuan nimin khan Mizo Hnam Rûn chhung inkhawm an nei a, an president Zoramthanga'n thu sawiin, sorkarna an chan chuan an tih hmasak ber tur chu bamboo link road a remchanna lai apianga laih a nih thu a sawi.

Zoramthanga chuan an sorkar veleh bamboo link road an ngai pawimawh dawn a, kawng an lai nghal tih sawiin, "Chu miin a ken tel tur tam tak chu thawh nghal a ni ang. Kan sorkar tirh phata thawh nghal tur chu kum 10 eptu lama kan awm lai khan kan ngaihtuah chhuak sa vek tawh a ni, " a ti.

Mizoram mipui náwlpui khawsak a harsa tlang tawh hle nia sawiin Zorama chuan, "Kan ît zawng pawh a tê tham tawh hle. MLA inthlanah pawh chhun/zanin sum sem tum kan inven a ngai ta a ni ber a, nutling/patling cheng 400/500, cheng sang hnih/khat ît kan tam ta. Mipuite hetiang mai mai ît lo tura rethei loa kan insiam a ngai ta," a ti a; a siamthatu tur leh retheihna lak ata mipuite chawi kâng turin MNF a sorkar a ngai niin a sawi.

Zoramthanga chuan, "Campaign laia kan tih tur leh vision ṭhenkhat kan sawi ṭhin, nuihza siam nana an hman ṭhinte kha Pathian zarah kan sorkar chuan ropui leh mak an tih khawpin kan la thlentir thei ang. Traffic jam pumpelh nana motor parking leh thil dang dang kan sawi ṭhinte pawh ropui an la ti hle ang," a ti.

Mizo Hnam Rûna inkhawmah hian MNF senior vice president Tawnluia leh vice president Dr R Lalthangliana te pawhin thu an sawi a; an candidate eng emaw zatin an dinna bial din­hmun an sawi bawk.