Ajasora-ah vote thlâk dawn

November 28, 2018-a Mizoram Assembly inthlana vote thlak zawh hman lohna, Tuichawng biala Ajasora khuaah chuan vawiin hian vote thlak ṭhat a ni dawn a, zing dar 7 aṭanga tlai dar 4 thleng vote thlak theih a ni ang.

Tarlan tawh angin, November 28-a MLA inthlan neih zawh takah khan Ajasora-ah hian EVM leh VVPAT a chian kuan loh avangin zan dar 12 thleng vote thlak ni mah se, vote thlak zawh hman a ni lo. Election Commission of India thupek angin vote hi thlak ṭhat leh a ni dawn a ni.

Ajasora hi Lawngtlai aṭanga kms. 150-a hla niin, he polling station hian Ajasora-I, Ajasora-II leh Ajasora-III te a huam a, vote nei mipa 543 leh hmeichhia 537, an vaiin mi 1,080 an awm. Inthlan buatsaih ṭhat a ngaih tak avang hian Ajasora polling station chu venhimna uluk ngai zual (critical) polling station-ah puan nghal a ni a, venhimna lam pawh uluk taka rua­hman a ni.