Hri lèn hnuah thlai thar a tam zawk - Horticulture dept.

Horticulture department hotute chuan, Covid-19 vangin thlai thar chhuah kawngah harsatna a awm phah loh thu Vanglaini palai zawhna chhangin an sawi a, "Thlai thar chhuah a tam zawk," an ti.

Covid-19 vangin miin thlai thar chhuak tura ṭan an lâk nasat thu sawiin Horticulture department hotute chuan, "Mipuiin a theih ang anga thlai thar chhuah an tum a, chuvang chuan Covid-19 lèn hma aiin thlai thar chhuah a tam zawk a ni," an ti a; bazarpuiah thlai zawrh theih ni se chuan kum dang aiin thlai man a tlàwm zawk an rin thu an sawi.

Horticulture department hotute sawi danin, lo neitute'n an thlai thar chhuah an khua vela an hralh zawh lohte chu Sairanga Cold Storage-a dah turin an hralh a; Commerce & Industries department chuan khâr chhâwng hnenah an hralh chhuak ve leh ṭhin. Thlai hralhna tur rate chu lo neitute ngaihtuah chunga bithliah a ni.