Thenzawl task force-in FIR thehlut

Thenzawl Town Task Force Committee chuan nimin khan an chairman R Lalramnghaka hmingin Thenzawl Police Station-ah FIR an thehlut a, Covid-19 vei Lawngtlai district mi pahnih, Thenzawla thingpui dâwra chàwlte chunga dan anga hremna lek turin an ngen.

Thenzawl TTFC chuan an FIR-ah hian, hripui léng vanga state dang aṭanga rawn haw Lawngtlai district mi khung hran turte'n Lawngtlai an panna kawngah zalên taka Thenzawl Field Venga Jon Jon Restaurant-ah chàwlin thil an ei tih an tarlang a, "He restaurant epa dâwrtê-ah thil an lei bawk. Heng mite hi Lawngtlai an thlen hnuah Covid-19 vei an ni tih finfiah a ni. Hei hian Thenzawl mipui min tichiai hle a ni," tiin an ziak.

Lawngtlai district mi pahnihte zalên taka an duh duh dana kawng laka an khawsa chu dan bawhchhiatna nia an hriat thu tarlangin Thenzawl TTFC chuan, "Hei bakah hian sorkarin inkhung hrang tura a tih an nih ni tih hre reng chunga mi dang himna tiderthâwng leh mi dang nunna atana hlauhawm an thlen leh mi an tithlabár a, mi dang harsatna an thlen avangin dan an bawhchhiatna leh mi dang tana pawi an thlen dan hi chhui chhuah a, dan anga an chunga action la turin kan ngen a che," an ti a; FIR chu pawm a, a ṭul anga hma la turin an ngen a ni.