Hâlpuah hâl lo turin Mizoram mipui ngen

Aizawl district police hotute chuan nimin khan Aizawl SP pisa conference hall-ah pawl hrang hrang hruaitute lêngah sáwmin, kumin Krismas leh kum tharte muanawm tak leh hlim taka mipuiin an hman theih nana hmalak dan tur an sawiho. Hâlpuah, hâlmawi leh silai lem (a mu kap nei chi) khapna thupek chu zâwm vek turin mi tin an ngen a, zawm a nih theih nan hmalak zui an rel bawk.

Inkawmhonaah hian Aizawla SDPO-te leh police station OC te, Central YMA, Mizoram Kohhran Hruaitute Committee (MKHC) hruaitute leh Mizoram Merchants Association (MIMA) hruaitute an tel.

Meeting kaihruaitu Aizawl additional SP Lalduhthlanga chuan, nikum Krismas leh kum thar vuakvêtah hâlpuah/hâlmawi khapna bawhchhiat vangin thubuai 20 ziah luh a nih thu a sawi a, "December 4 leh January 4 inkarah case 20 register a ni a, mi 33 man niin convict vek an ni. Thiam loh chantirte chu pawisa chawitir an ni," a ti.

Lalduhthlanga chuan, nikum lama hunpui­ah hâlpuah leh hâlmawi eng emaw zat police-in an man thu sawiin, "Kan man loh, puak erawh a awm lo thei lo. Sumdáwngte kan véng ṭha viau a, sumdawng ni lo, mimala lo la lut an awm niin a lang," a ti a; nikum lamah chuan hâlpuah leh hâlmawi hâl khapna thupek a hlawhtling thawkhata an hriat thu a sawi.

Aizawl additional SP dang, PC Lal­chunglura, Police PRO ni bawk chuan, Aizawl DC-in kuminah November 7-ah a tichhuak tawh tih a sawi a, "Vawiin aṭangin hâlpuah checking kan ti ṭan, sumdawnna hmunte endik ṭan a ni," a ti.

Meeting-a an thurel Police PRO-in a tarlan danin, Aizawl district-ah chuan halpuah, hâlmawi leh silai lem (a mu nei chi) khapna bawhzui tura Police leh Central YMA-in sub-committee leh squad an siamte'n dan loa hâlpuah leh silai lemte an dap ṭhin dawn a ni.

Central YMA-in veng/branch tinah hâlpuah hâl lo tur leh ngenna an siam tawh a, kohhran hruaitute'n kohhran tinah ngenna siama puan a nih theih nan hma an la ang. MIMA hruaitute'n sumdawng leh dawrkaite hnenah ngenna leh hriattirna an siam nawn leh ang a; police leh NGO ten joint duty leh checking a zing thei ang berin an neih ang a, dan bawhchhiate chu IPC Section 188 hmanga hrem tura hma lak a ni ang.

Police-a Aizawl DEF-te'n media leh vantlang hmun hrang hrangah awareness campaign atan thuziak, banner, poster-te tár turin an inbuatsaih mek a; Aizawl district chhunga veng tin local council-te leh V/C-te chu an huam chhung ṭheuhah hma lo la, public announcement a tam thei ang ber nei turin an ngen bawk.

Police thuchhuah chuan, "Hâlpuah leh a kaihhnawi hrang hrangte leh silai lem, a mû kâp chhuak thei chite hi hriselna atana ṭha lo leh hliam/chhiatna thlen thei an nih avangin, mi tinte zuar lo tur leh hâl/hmang lo turin meeting chuan a ngen tak meuh a ni," a ti.