ACB-in Thubuai paruk an ziak lut

Anti Corruption Bu­reau (ACB) chuan kumin chhungin thubuai paruk an ziak lut a, thubuai parukah hian mi 27 thubuai siamsak an ni. Kumin chhung vekin ACB chuan eirûk thubuai a chhuina kal zelah mi pahnih chu Court-in thiam loh a chantir.

ACB hian complaint an dawnte chu chhui chiangin, chhui zui tlaka an ngaihte chu an chhui zui a, an thil hmuh chhuahte chu Vigilance department-ah an thehlut ṭhin.

Vigilance department-in ACB thil chhuina an zir chian hnuah, criminal case-in nge departmental inquiry-a kalpui turah thutlukna an siam ṭhin a, an duh chuan thubuai chu chhui zui tawh lo turin an ti thei bawk.

Kumina ACB case-te
1) Labour Employment & Industrial Training department sum Rs. 19,00,00,000 tihchingpen thubuaiah mi pakhat thubuai siamsak a ni.
2) MGNREGS sum Rs. 1,09,076 leh Rs. 69,938 tihchingpen thubuaiah mi pahnih thubuai siamsak an ni.
3) CSS fund Rs. 32,82,900 tihchingpen thubuaiah mi paruk thubuai an siamsak.
4) Chakma Autonomous District Council-a sorkar pawisa Rs. 1,14,20,300 thubuaiah mi 13 thubuai siamsak an ni.
5) Excise & Narcotics department hnuaia Rs. 1,73,48,365 tihchingpen thubuaiah mi pathum thubuai an siamsak.
6) AH&Vety department hnuaia Rs. 10,39,489 tihchingpen thubuaiah mi pahnih thubuai siamsak an ni.