Vote chhiarnaa duty turte tan training
Mizoram Assembly inthlan zawh taka vote tlate December 11, 2018-a chhiar a nih huna duty turte tan nimin khan Kolasib IPR conference hall-ah training buatsaih a ni a, Kolasib DEO Dr Arun T-a'n a hmanpui.
Dr Arun T chuan, vote chhiar nía duty turte chu fimkhur tak leh uluk taka hna kalpui tura chahin, "Counting official bakah counting hall-a lut turte tan mobile phone, cigarrette leh lighter-te ken luh phal a ni dawn lo. Counting hall-a vawi khat luh tawh chuan counting hall building hi vote chhiar zawh hma loh chhuahsan phal a ni lo," a ti.
Training-ah hian deputy CEO Lalṭanpuii Hnamte chuan , Representation of The People Act, 1951 hnuaia official mawhphurhna te, thil tih tur leh tih loh tur te, counting centre-a security ruahmanna te, postal ballot kaltlanga vote chhiar chungchang te, vote chhiar kalphung te, form hrang hrang hmanga election result report dante leh result puan chungchangte a sawifiah a; counting official-te'n hriatfiah duh an neihte a chháng nghal.
Kolasib district-a vote chhiar nía duty tur hian counting micro observer-ah mi 57, counting assistant-ah mi 50 leh counting supervisor atan mi 50 ruat lailâwk an ni a, remchan dan azirin sîksawi theih an ni. Constituency pathuma vote tlate chu Kolasib College-a hall hran ṭheuhah chhiar a ni ang.