Laldenga thlânah pangpar dah

Nimin, July 7 kha MNF dintu leh president hmasa ber Laldenga, mi tam takin 'Mizo Hnam Pa' tia an sawi thih champha a ni a, nimin zing khan a thlanah a nupui Lalbiakdiki leh MNF party hruaitute'n zahna leh hriatrengna entir nan pangpar an dah.

MNF president Zoram­thanga chuan, Laldenga thih champhaa kum danga programme an siam ṭhin ang chu kuminah chuan inkhàrkhip vangin tih a rem lo tih sawi a, "Mizo Hnam Pa Pu Laldenga ang hi Mizo nu hian an hring leh ang em, tih hi rin hleih theih a ni lo. A ropuina hi ni tin Mizo hnam leh ṭhangthar zelte'n kan la chhût chhuah kim loh a la awm zelin ka hria," a ti.

Zoramthanga chuan, Laldenga thih champha vawi 30-naah amah an chawimawiin an ngai ropui tak zet a ni tih an lantir tih sawiin, "Mizo hnam hian amah kan chawimawina hi kan lantir zel tur a ni ang," a ti a; Laldenga ropuina chu Mizo mipuite'n kumkhuaa an hriat reng tur a nih thu a sawi.

MNF sr. vice president Tawnluia, dy. CM pawhin nimin khan Laldenga thlanah hian pangpar a dah a, "Pu Laldenga hi Mizo hnam hruaitu ropui, indo lai leh ralmuan lai pawha Mizo mipuite hruaitu ber, Mizote khawvel hriata pholang tu a ni. Mizo hnam chi tuh ṭiak tu ropui tak a ni a, ‘Mizo Hnampa’ tia koh hi a phu em em a ni," a ti.

Laldenga hi July 11, 1927-ah Lunglei Pûkpuiah a piang a, kum 1944-ah British Indian Army a zawm. Kum 1959-ah Mizo National Famine Front a din a, MNFF chu October 22, 1961-ah Mizo National Front (MNF) tia thlâk a ni. MNF-ah hian a thih thlengin president a ni.

Kum 1986-a Mizoram sorkar lailâwk (interim)-ah chief minister a ni a, kum 1987-a Mizoram state Assembly inthlan hmasa berah Sateek leh Aizawl North-II bialah thlan tlin niin, chief minister a ni chhunzawm. Laldenga hi kum 1990-ah cancer a nih hriat a ni a, Memorial Sloan Kettering Cancer Centre, USA-ah thla thum enkawl a nih hnua Mizoram pana an haw kawngah Ashford Hospital, London-ah July 7, 1990 khan India huna chawhnu dar 2:30-ah a thi. A ruang chu July 11, 1990 tlaiah Aizawl thlenpui a ni a, July 13-ah state funeral-a vui niin, tun thlengin Mizo zinga state funeral-a vui awmchhun a la ni.