KHAWTHLIR

MHIP, Mamit Bazar Veng Branch chuan MHIP Day (July 6) lawm nan nimin khan Mamit District Hospital-ah blood donation camp an huaihawt a, MHIP member mi pathumin thisen an pe. Mamit Bazar Veng MHIP hian quarantine centre ṭhenkhat hnenah Rs. 5,000 leh kawlphetha lam buaipuitute mamawh atan P&E department hnenah Rs. 2,000 an pe bawk.

Lehkhabu C Laldinthara lehlin 'Coronavirus leh Krista' (John Piper ziah) leh H Lalroluahpuia lehlin 'Engvangin nge leilung chhiatna hi Pathianin a phal' (David Pawson ziah) tihte chu nimin khan MAL Book of the Year dawng tawh Lalhruaitluanga Chawngte-in a tlangzarh. Lehkhabu letlingtute hian an lehkhabute hi MJA Public Library tan bu thum ve ve an pe nghal a ni.

Nimin zing dar 2 vel khan buhfai phur truck, Aizawl lam pana tlan chu Sihphir Neihbawiha Synod Camping Centre bulah chesualin kawng thlangah a lum a, a khalh-tu Malsawmkima (40) s/o Rolala, Bungkawn Nursery Veng chu a hmunah a thi. Truck-ah hian driver chiah a chuang nia hriat a ni a; Sihphira mi tawmngaite leh police-te'n an buaipui zui a ni.

Zoram Peoples' Movement (ZPM) hruaitute chuan nimin khan an president Lalliansawta hoin lirnghingin East Tuipui biala a tihbuai khuate fang turin Aizawl an chhuahsan. ZPM hruaitute hian Rs. 1,00,000 leh silpauline eng emaw zat kengin, mamawh dan azira sem turin Tuipuiral Group YMA hnenah an hlan dawn a ni.

Aizawla All India Radio leh Doordarshan Kendra director hlui Sailothanga Sailo (76) h/o Lalrosangi, Vaivakawn chu nimin chawhnu dar 2:15 khan cancer avangin a thi a, vawiin chawhma dar 10-ah an inah vui a ni ang. Sailothanga Sailo hi Guwahati-a DDK director a nih laiin kum 2009 khan pension-in a chhuak a; Vaivakawn Presbyterian kohhran upa a ni bawk.

Nimin khan Lunglei DC pisa conference hall-ah Task Force Committee under DAY NULM, Lunglei Town Vending Committee, Prime Minister Street Vendors Atma Nirbhar Nidhi tlangzarh a ni a, home hrang hrang hnenah thilpek hlân nghal a ni. Shelter for Urban Homeless hnuaia ṭanpuina hi Observation Home, Chhawm­dawlna In, Mercy Home, WADA, Child Care Centre, Special Home, Bethel Centre leh Rescue Centre hnenah washing machine, AC blanket, fire extingui­sher, mattress leh gas connection an hlan a ni.

Minister of state Robert Romawia Royte chuan kumina MHIP Day pualin July 6 khan a biala MHIP branch pasarih - Dawrpui, Chhinga Veng, Saron Veng, Tuithiang, Armed Veng, Amed Veng South leh Chite Vengte hnenah Rs. 10,000 ṭheuh a hlân. Robert Romawia chuan, MHIP chu hmeichhiate chawi kânnaa sûlsutu pawimawh, Mizo hnam ro hlu an ni tih a sawi a; Chhinga Veng MHIP In sak ṭhat nan sorkarin Rs. 2,00,000 a pek tur thu a sawi bawk.

Aizawla awm 46 Assam Rifles chuan July 4-6, 2020 inkar khan tree plantation drive hmangin, Environment, Forest & Climate Change department puihnain an hmun thar Zokhawsangah thing ṭiak chi hrang hrang 1,000 chuang an phun. Thing an phunte chu enkawl zui a nih thei nan sipai chhungkaw tinte hnenah an enkawl tur bik siam a ni.