KHAWTHLIR

Covid-19 hripui laka Mizoram venghim tura ramria duty laia chesuala hliam, Lalpianvula (65) h/o Lalchhanhimi, Zawlnuam Bawrai chu nizan dar 7 vel khan Aizawl Civil Hospital-ah a thi. Lalpianvula hi May 15, 2020 khan ramria an duty-na hmun aṭanga chawchhùn ei tura in lam pana a haw chu an chuanna motor (Pik-Up) aṭangin a tla a, hliam na tak a tuar a ni.

MJA, Lawngtlai district chuan June 18, Ningani khan Covid-19 donaa thawktu Lawngtlai District Hospital-a medical team hnenah ṭanpuina chi hrang hrang an hlân. Lawngtlai MJA-te hi an president Lalngheta Ralte hoin medical superintendent Dr Zothanpari pisaah an kal a; ṭanpuina hi Lawngtlai MJA vice president Elvis Lalthangzuala leh general secretary Lalchharliana ten Dr Zothanpari hnenah an hlan a ni.

Nimin chawhnu dar 1:30 vel khan R Thlamuana (72) h/o Lalbiakmawii, Thenzawl Farm Veng chu electric current-in a man hlum. Thenzawl 

ṭanga thu dawn danin, R Thlamuana hi an in 

aṭanga an kawta ar vulh­naa kawlphetha pekna a siamnaah electric current-in a man a, nikhaw hre loin a awm nghal. Thenzawl damdawi-in panpui nghal ni mah se, an chhan hman lo a ni.

MADC chief executive member N Zakhai chuan Khopai ramria duty zinga mi, tun hnaia thi Nelson K Beizachhi chu nimin khan a rál a, a chhungte hnenah CEM Relief Fund aṭangin Rs. 1,00,000 a hlân. N Zakhai chuan, Nelson K Beizachhi chu ram pasalṭha a nih thu leh a chhungte an tuarpui tak zek thu a sawi.

YMA Sub-Hqrs, Serchhip chuan Covid-19 vanga ramri hrûla duty-te mamawha hman turin nimin khan YMA Sub-Hqrs, Champhai hnenah Rs. 1,00,000 an hlân. Sum an hlan hi Ser­chhip district-a khaw hrang hranga mimal, YMA leh task force-te thawh khawm a ni.