Sipai khung hran chungchang sawiho Khauh lehzuala kalpui ṭha tih a ni

Nimin khan Health minis­ter Dr R Lalthangliana hoin Secretariat conference hall-ah Social Welfare minister Dr K Bei­chhua, Medical Operational Team chairman Dr ZR Thiamsanga, MLA leh sorkar official-te an ṭhukhawm a; sipai leh paramilitary force-te khauh leh zuala khung hran dan tur an rêl.

Dr R Lalthangliana chuan, Covid-19 dona kawnga thawktute chungah lawmthu sawiin, "Department tinte an che ṭha hle. Tun hnaiah district tin ka fang chhuak a, an hmalak dante ka hriatpui. Hah taka thawktute chungah lawmthu ka sawi a ni. Inthlahdul loa ṭan mar erawh a ṭul hle. Tangkhang a hlâwma haw huk an awm tawh lo a, lo lut tur pawh an tam tawh loin a lang. Mahni mimal motor-a zankhaw tairêkah leh zing khawvar hmaa haw ṭhinte chung­chang erawh ngun lehzual­a ngaihtuah a ngai a ni,". Tun hnaiah Lungleia BSF sipaite leh Aizawla NDRF awm mekte zingah Covid-19 vei mi eng emaw zat hmuh chhuah a nih thu meeting-ah hian sawi a ni a; mipuiah an put darh lohna turin khirh leh khauh taka ruahmanna felfai kalpui dan tur sawiho niin, ruahmanna siam ni se, an ti.

Ṭhutkhawmah hian, sipai leh paramilitary force-te zingah quarantine an kalpui ṭha tâwk em tih leh, Covid-19 laka invènna tur ruahmannate an zâwm ṭha em tihte enfiah a, khauh lehzuala inkhung hran chungchang kalpui ṭha an ti a ni. Tangkhang ni si lo, thil pawimawh dang vanga state leh state inkara veivâk te, district leh district inkara veivâkte chungchang pawh sawiho a ni a; natna an thehdarh loh nan ruahmanna felfai zawk duan ṭul an tih thu an sawi bawk.