Sikula hman tur SOP ṭha tâwkah ngai ; Sikul/hostel-te'n himna turah hma an la ṭha lo : MSCPCR
Mizoram State Commission for Protection of Child Rights (MSCPCR) hotute chuan, kar leh aṭanga Mizorama sikul hawn ṭan tura School Education department-in Covid-19 kaihhnawiha inkaihhruaina a duan chu a ṭha tâwka an ngaih thu an sawi a; chutih rualin, Mizorama sikul leh hostel-te'n naupang himna atana hma an lak dan a ṭha lo hle tih an sawi bawk.
MSCPCR hotute chuan nimin khan an pisaah thuthar thehdarhtute an kâwm a; an chairman Dr Sangzuala chuan, "Zirna in hawn ṭan turah MSCPCR chuan zirlaite himna a ngai pawimawh a, School Education department-in SOP a duan chu ngun taka kan zir chian hnuah a ṭha tâwkah kan ngai," a ti. Mizorama sikulte chu kum 2022-23 session atan kár lehah hawn ṭan a ni ang.
Dr Sangzuala chuan, "Education department-in SOP a duan hi zirna-in hrang hrangah ṭha taka an zawm chuan naupangte tan a him tâwkah Commission chuan a ngai," a ti a; Education department leh MSCPCR chuan sikulah SOP ṭha taka zawm a nih theih nan theihtawp an chhuah dawn tih a sawi.
Right to Education (RTE) Act-in naupangte humhalhna leh hamṭhatna a pekte ṭha taka kenkawh a nih leh nih loh viltu atana ruat a nih angin MSCPCR-in zirchianna a nei nual tawh tih sawiin Dr Sangzuala chuan, "Mizorama kan zirna-inte a tlangpuiin ṭha thawkhat mah se, hmasawnna tur tam tak a la awm tih a lang," a ti.
MSCPCR Chairman tarlan danin, MSCPCR hian January 2019 khan zirlaite awmna hostel leh canteen ṭhenkhatte an endik a, February 2021 khan sikul 14 leh hostel paruk an endik leh bawk. Mizorama zirna-inte naupangte tan a him tâwk em tih zirbingna, 'Safety and Security of Schools in Mizoram' tih chu a bu-in an tichhuak tawh a ni.
Dr Sangzuala chuan, "Endikna leh zirbingna aṭangin zirna-in hrang hrangte hi chawhrualin him thawkhat mah se, hmasawnna tur a la tam hle. Sikul building leh a kaihhnawihah chuan zirna-in sang lam aiin a hniam lamah naupangte an him lo deuh zawk zel. Hengte hi hmasawn ṭul zualnate a ni a, Commission chuan a tahtawlin a ṭul angin a ûm zui zel dawn a ni," a ti.
Zirna-inte chu ruhrel hrang hrangah duhthusam lo a tam tih sawiin Dr Sangzuala chuan, "Hri léng karah zirna-in hawn tur a nih avangin zirlaite himna turin zirlaite leh zirtirtute mai bakah, nu leh pate'n kan tih tur leh tih loh turte ṭha taka kan zawm a ṭul dawn a ni," a ti a; fimkhur leh dimdawi taka naupangte enkawl turin zirtirtute leh nu leh pate a chah.
MSCPCR member J Malsawmzuala Vanchhawng chuan zawhna chhangin, Commission chu naupang kaihhnawiha pawi khawihtute ko thei, thu zawtfiah thei leh hrem theitu a nih thu a sawi a, "Social media lama naupangte dan kalha tarlangtu mi pathum koh an ni tawh a, kan hrem chiah lo a, kan zilh," a ti.
MSCPCR secretary Zoramthangi Chhangte, Women and Child Development joint director ni bawk chuan, Covid-19 hripui léng vanga inkhàrkhip ṭan tirh aṭangin ICDS-in khaihlak awm loin nutrition an sem vek theih thu a sawi a; Social Welfare department-in children's home 50 a enkawl mek thu a sawi bawk.
MSCPCR member-te tarlan danin, Child Welfare Committee (CWC)-in Covid-19 vanga nu emaw, pa emawin an thihsan naupang 154 an chhinchhiah a, chu'ngte chu chhungkua 84-a mite an ni. Chu'ngte chu chhawmdawlna pek an ni a; naupang 154 zinga 15 chu a bik taka chhawmdawl ngai zual an nih avangin PM Cares hnuaiah ṭanpuina thla tin Rs 2,000 pek an ni.
SIKUL HIM TAWK LOHNATE
1) Chhiatrupna thilah, kângmei laka invenna leh kâng ṭhelhna hmanrua
2) Rîkrum thila tlân chhuahna tur
3) Sikul building himna chungchangah
HOSTEL HIM TAWK LOHNATE
1) Hostel ṭhenkhatah zirlai an inêkbeng nasa
2) Upa tawh deuh leh naupang zualte thliar hran mumal a ni lo
3) Hostel ṭhenkhatah khum insi khupin naupangte muttir an ni
4) Hursualna lam hawia pawikhawihna thleng palh thei thilah a him lo
5) Hostel tam takah inthiarna an indaih lo, a awmchhunte pawh a thianghlim tâwk lo
6) Ei leh inin duhthu a sâm lo
7) Tukverh mumal awm lohnate a awm
8) Chhiatrupna thleng thei laka inpuahchahna mumal a awm lo tlangpui