Aizawl tan SOP hranpa a awm tawh lo
State Disaster Management Authority (SDMA) State Executive Committee (SEC) chairman Dr Renu Sharma, chief secretary chuan March 31, Ningani zan khan Mizorama Covid-19 darh zel tur vênna atana inkaihhruaina thar a tichhuak a; Aizawl khawpui tan a bika inkaihhruaina hranpa siam a awm tawh lo.
SEC Chairman chuan, Mizorama Covid-19 léng mek dinhmun chu SDMA chuan thlirin, ziaawm lam a pan hret hreta a hriat thua tarlang a, "India ramah pawh Covid-19 dinhmun a ziaawm zel bawk avangin eizawnna leh mihring nunphung nghawng nasa lo zawnga hmalak chhunzawm a nih theih nan inkhuahkhirhna awm mek chu thlahdul hret ṭula hriat a ni," a ti.
Covid-19 inkaihhruaina tharah hian zirna-in hawn theih zingah anganwadi leh creche centre-te a tel a, chu'nga inkaihhruaina tur Social Welfare department-in a siam chu ṭha taka zâwm tura tih a ni. Kohhran inkhawma zai chungchang tarlan a ni lo a, zai khap a ni lo.
Inkaihhruaina thar hi thu leh awm hma zawng hman tur a ni a, dan zâwm lote chu Disaster Management Act 2005, The Mizoram (Containment & Prevention of the Spread of COVID-19) Act 2020 leh IPC Section 188 hmangin hrem theih an ni.
Covid-19 inkaihhruaina ṭhenkhat
1. Ṭul loa páwn chhuah leh inlênpawh loh hram ni se.
2. DC-te’n a ṭul angin Operational Guideline for Containment and Surveillance Plan of Covid-19 kenkawh a nih theih nan hma an la tur a ni.
3. Sikul leh hostel-te April 5, 2022 aṭangin hawn theih a ni. School Education department-in SOP a chhuah chu ṭha taka zawm tur a ni a, zirtirtu, thawktu dangte leh zirlaite’n vaccine an lâk vek theih nan hma an la ang.
4. Anganwadi leh creche centre-te hawn theih a ni a, Social Welfare department-in SOP a chhuah chu ṭha taka zawm tur a ni. Anganwadi worker leh hnathawk dangte’n vaccine an lak vek theih nan hma an la ang.
5. University, college, technical & professional institution-a final semester zirlaite tan class leh hostel hawn phal a ni.
6. April 1, 2022 aṭangin UG & PG-a practical subject student-te tan practical class leh hostel hawn theih a ni.
7. Semester zawng chu July 2022 aṭangin class pangngaia kal theih a ni ang.
8. Kohhran inkhawm pangngai chhun leh zanah phal a ni a, zing inkhawm pawh phal a ni.
9. Chhun leh zanah inkhawmpui neih phal a ni.
10. Inkhawmna leh inkhawmpuiah ruai buatsaih loh ni thei se.
11. Inneih inkhawm leh mitthi vuinaah a chhunga leng zat zatve (50%) aia tam loin phal a ni a, a theih chin chinah ei leh in sem loh ni se.
12. Sports inelna, tournament, adt. (indoor & outdoor) phal a ni a, indoor bikah infiamna hmuna leng zat zatve (50%) aia tam lo entu mipui punkhawm phal a ni.
13. Mizoram sorkar hnathawkte dan pangngaiin pisa an kai ang.
14. Central sorkar pisa leh Central PSU-te central sorkar thuchhuak angin an kal ang.
15. Kohhran pisa leh private company/office - consultancy service, adt.-a thawkte dan pangngaiin pisa an kai thei.
16. Activity dang zawng chu phal vek a ni.