Mizorama helicopter hman thlâk tum a ni

MNF adviser J Lalhmingliana, GAD Aviation Wing-a principal consultant ni bawk chuan, Mizorama thlâwk mek Pawan Hans helicopter-ah chuang thei zat a tlem avangin helicopter lian zawk thlawhtir tumin company dang ngaihven mek a nih thu a sawi.

J Lalhmingliana hian nimin khan Mizo Hnam Rûna inkhawmah thu sawiin, "Helicopter service kan neih mek Pawan Hans hi chuang thei an tam lo a, sorkar laipui chuan a aia lian, company dang zawng turin thu min ràwn a, tunah hian kan hotute'n an ngaihven mek a, a man to deuh chi ṭha tak company pahnih neih tumin hmalak mek a ni," a ti.

Tun hnaia Lengpui Airport chei ṭhat laia chim chungchangah J Lalhmingliana chuan, "A rî a ring khawp mai. Kha chhiatna avang khan Mizoram sorkar hian cheng khat pawh a sèn belh dawn lo a, contractor-in ama sum séngin a siam leh vek tur thu amah aṭang ngeiin lehkha kan dawng nghal a ni," a ti a; kum 11 kal taa sorkar hmasain DVRO an bun duh loh, an hluihlâwn tawh chu Hmunpui tlangah sorkarin a dah tawh thu a sawi.

Aviation Wing Principal Consultant chuan, airline service leh airport tihchangtlun nan sorkarin nasa taka hma a lak thu leh Mizoram BJP-te'n Covid do lêtna tur sum Lengpui Airport siam nan hman a ni anga an sawi chu an hriat loh vang a nih thu a sawi a, "Lengpui Airport hi North East Special Infrastructure Development Scheme (NESIDS) hmanga siam a ni," a ti.

J Lalhmingliana chuan, Lengpui Airport chu hmarchhak biala a ṭha páwl tak a nia sawiin, "Kan CM hian a ngai pawimawh em em a, a tìrah ni tin passenger 300 lut leh chhuak dâwl zo turin siam a ni a, tunah hian ni tin lut leh chhuak mi 1,600 vel zel a ni. Passenger 2,800 vel lût leh chhuak dâwl zo turin kan siam mek a ni," a ti a; an hmalaknain rah a chhuah hunah chuan Mizo mipuiin an chhuan dawn thu a sawi bawk.