Ni 93 chhungin mi 26,548-in Sahuan an tlawh

Aizawl Zoological Park (Sahuan) chu ni 93 chhungin mi 26,548-in an tlawh a, tlawhtute aṭangin Rs 4,09,280 hmuh a ni.

Aizawl Zoo Range Officer hnen aṭanga Vanglaini thu dawn danin, Covid-19 avangin hun eng emaw chen Aizawl Sahuan hawn mumal theih a nih loh hnuah October 5, 2021 aṭangin mipui tlawh theiha hawn a ni a; March 31, 2022 thleng khan, ni 93 chhung hawn niin, mi 26,548-in an tlawh.

Sahuan enkawltute chhinchhiah danin, ni 93 chhunga tlawhtute chu kum 10 chung lam mi 19,627 leh kum 10 hnuai lam mi 6,921 an ni a; Sahuana luh man bakah, lirthei chi hrang hrang 7,806 leh still camera/video camera 111 an kente aṭangin Rs 4,09,280 an hmu a ni.

Range Officer chuan, Aizawl Sahuan chu mipuiin an hlut chhoh zel tih sawiin, "Tlawhtu pawh an pung zel a, a hmunhma pawh a tlawhtu mipui tana chhenfâkawm zawk tura buatsaih mek zel a ni. Tunah hian state páwn sahuan dang aṭangin ramsa ṭhenkhat lak luh tumin hmalak mek a ni," a ti a; Sahuan tlawhtute chu bawlhhlawh a báwmah chauh paih turin a ngen.

Aizawl Zoological Park-ah hian ramsa/sava chi hrang 47 awmin, a vaiin 377 a awm mek a, thawktu 21-in an enkawl mek a ni.