SEDP vangin MNF an tla dawn - CLP Leader

Congress Legislature Party (CLP) leader Zodintluanga Ralte, MPCC treasurer ni bawk chuan, MNF kaihhruai sorkar chu SEDP avanga sorkar an ni tih sawiin, "SEDP vang vêkin an tla dawn," a ti.

Zodintluanga Ralte hian nimin khan a bial chhung khuate a tlawhnaah thu sawiin, "MNF sorkar hi SEDP vanga tling an ni a, SEDP vang vêkin an tla leh dawn. Inthlan dawn hnaiah SEDP dawng tur chhungkua an thlang ve ṭan chauh a ni. Lei rem an rahna tura bekang leh telhâwng tih vel an thlantir hian mi harsa zawkte a tibeidawng hle a ni," a ti a, SEDP kalpui dan tur chu a beidawnthlak thu a sawi.

Congress sorkar laiin mi harsa zawkte thleng phak budget an siam ṭhin thu sawiin CLP Leader chuan, "MNF sorkarah chuan kum li a kal hnuah pawh loneitute leh kut hnathawktute tan budget-ah eng mah dah a la ni lo a, sorkar hnathawk hlawh leh inrêlbàwlna bak budget-ah dah a ni ngai lo. CM-in minister-te budget-ah hna thawhna tur a dahsak ngai lo," a ti.

Zodintluanga Ralte chuan, minister-te'n hna an thawk duh a nih chuan Chief Minister an tlawn a ngaih thu sawiin, "CM hian department-ah pawisa sem sawm loin ama control turin a dah vek a, amah tlawn thiam leh tilungawi thiam minister-te an vannei ṭhin," a ti a; democracy rama tiha mawi lo takin CM-in sum leh paia thuneihna a pumhmawm vek thu a sawi.

CLP Leader chuan, Mizo mipui tan Congress a sorkar leh a ṭul thu sawiin, "Sorkarna kan siam a nih chuan budget-ah miretheite khai chhuahna tur ruahmanna ṭha zawk dah leh a ni ang. Ṭhat loh theih lohna báwm hmangin langtlang sorkar, sorkar ṭha leh dik siamin, mi harsa zawkte kan khai chhuak leh dawn a ni," a ti.