KṬP inkhawmpui liana tel turte swab test vek tura tih sût rih

Kumin May thla tìr lama Kolasib-a KṬP General Conference neih tura tel turte rapid antigen test (RAT) hmanga Covid-19 swab test tih vek tura thutlukna siam tawh chu sût rih a ni.

Kolasib district magistrate Dr H Lal­thlangliana chuan nimin khan thupek thar chhuahin, KṬP General Conference-a Kolasib district páwn lam mi palai kal turte RAT hmanga swab sample endik vek tura tih chu sût rih a nih thu leh, inkhawmpui dawn hnaihah Covid-19 dinhmun azirin swab test chungchang chu ngaihtuah ṭhat leh a nih tur thu a tarlang.

Kolasib DC chuan, KṬP General Conference neih tura Covid-19 inkaihhruaina tihchhuaha RAT tih vek tura tih tawh chu Covid-19 dinhmun a tlâkhniam avang leh sorkarin inkaihhruaina a thlahdul tâk zel avangin ṭul loa hriat a nih thu a tarlang a, "Hmai tuamna hman, kut tihfai ṭhat leh invenna dangte erawh ṭha taka zawm tur a ni a, inkhawmpui hun dawn hnaihah Covid-19 dinhmun azirin test neih chungchang chu ngaihtuah ṭhat leh a ni ang," a ti.