KHAWTHLIR

Kawlphetha pe thei dawn lo
Power & Electricity department chuan vawiin chawhma dar 10 leh chawhnu dar 2 inkarah indoor sub-station-ah hna an thawh dawn avangin veng ṭhenkhatah kawlphetha an pe thei dawn lo tih an tarlang a, mipui hriatthiamna an ngen. Kawlphetha hmu thei lo tur vengte chu - Zarkawt ṭhenkhat, Dawrpui, Tuikual tlem leh Treasury Square-te a ni.

Hmalakna enfiah
Minister of state Dr K Beichhua, Siaha bialtu MLA chuan nimin khan Siaha khawpuia sorkar hmalakna leh hmachhawp hrang hrang a enfiah. Minister hi department engineer-te leh sorkar hotuten an ṭawiawm a ni.

Zanriah buatsaih
Minister of state Robert Romawia Royte chuan March 31, Ningani khan Mumbai Mizoram House-a cancer veite leh anmahni awmpuitu mi 30-te tan zanriah a buatsaih. Sorkar thuchhuah tarlan danin, Mumbai Mizoram House-a awmte chuan Minister hnenah hian an harsatna leh mamawhte an thlen a; Minister hian a ṭhian ṭhate nen thawh khawmin an mamawh zualpui phuhrûk nan Rs 3,00,000 a pe dawn a ni.

Hualtu khua tlawh
Deputy speaker Lalrinawma chuan nimin khan a bial, Tuikum huam chhunga kum 2022-23 chhunga Pradhan Mantri Adi Aadarsh Gram Yojana (PMAAGY) kalpuina tur Hualtu khua a tlawh a; sorkar aṭanga duhsakna an dawn chu dik tak leh ṭha taka hmang turin a chah. Ministry of Tribal Affairs chuan PMAAGY 2022-23 kalpuina atan Mizorama khua 344 a thlang a ni.

Thilpek hlân
Sustainable Environment and Ecological Development Society India leh MedGlobal chuan Lawngtlai district bawrhsap mawhphurhna la mektu Marilyn Rualzakhumthangi hnenah nimin khan damlo enkawlna hmanrua leh damdawi hrang hrang an hlan. Thilpekte hi cheng nuai 20 man a ni.