Serchhip DC leh MJA-te an inkâwm

Serchhip DC thar Kumar Abhishek chuan nimin khan a pisaah Mizoram Journalist Association (MJA), Serchhip district member-te a kâwm a, thil chi hrang hrang sawipuiin, district hmasawnna atan thawhpuiah a sáwm.

Kumar Abhishek chuan, October 2018 aṭangin Mizoramah a awm ṭan thu sawiin, Mizoram chu ram rálmuang, mipui inpawh tláng leh boruak nuam tak nia a hriat thu a sawi a, "Serchhip district hi ram lailía awm, ziak leh chhiar thiam tamna district, faina kawnga hma la ṭha a nih avangin nuam ka ti nghal hle a ni," a ti.

Serchhip Bawrhsap chuan, a theih anga tam district chhunga khuate tlawh a duh thu leh, Mamit district-a a awm laia a lo tih tawh, 'In khuaah sorkar' tih prog­ramme pawh a theih chuan Ser­chhip district-ah kalpui leh a duh thu a sawi. 'In khuaah sorkar' tih a lo kalpui tawh dan chuan, sorkar official-te'n a ruala thing­tlang khuate tlawhin, mipui mamawh an tihsak theih apiang an tihsak ṭhin a ni.

Serchhip MJA President chuan, DC thar chu chanchinbumite'n an lo lawm thu sawiin, kawng engkimah thawhpui an inhuam thu a hrilh a; a ṭul a nih chuan chanchinbumite chu thuràwn pe a, kaihhruai an ngaihnaah engkim hrilh hreh lo turin a ngen.

Serchhip IPRO K Saitluanga'n Serchhipa media dinhmun tlangpui sawiin, Serchhip khawpuiah ni tin chhuak chanchinbu pasarih, cable TV pathum, MJA member 10 an awm thu leh, MJA member dang Thenzawlah pahnih leh North Vanlaiphaiah pakhat an awm thu a sawi.